शशिधर भण्डारी÷जनखोजी
प्युठानमा दुई फार्मेशी बन्द र एउटा फार्मेशीमा सील गरिएको छ । अनुगमनका क्रममा कानुन विपरित सञ्चालन गरेको पाइएपछि प्रशासनले रोक लगाएको हो ।
शुक्रबार औषधी व्यवस्था विभाग नेपालगंज र ईलाका प्रशासन कार्यालय जस्पुरको संयुक्त अनुगमन टोलीले प्युठान जिल्लाको माण्डवी गाउँपालिका जसपुर र स्वर्गद्धारी नगरपालिकाका मेडिकल तथा फामेशीहरुको अनुगमन गरेको हो । पाँच वटा औषधी पसल तथा मेडिकल हलमा अनुगमन गरिएकोमा २ वटा फार्मेशीलाई बन्द गरिएको र १ वटा मेडिकल हलको फार्मेशीलाई सिल गरिएको इलाका प्रशासन कार्यालय प्युठानका प्रमुख बाबुराम पुरीले जानकारी दिए ।
माण्डवी गाउँपालिका जसपुर स्थित जनता हेल्थ क्लिनिकले औषधी व्यवस्था विभागबाट औषधी बिक्रि वितरणको अनुमति नलिएको र फर्माशिष्ट वा फार्मेशी सहायक नराखेको हुँदा उक्त हेल्थ क्लिनिकलाई सिलबन्दी गरिएको छ ।
औषधी पसलमा फर्माशिष्ट उपस्थित नभएका दुईवटा औषधी पसलको फार्मेशी बन्द गरि अविलम्ब औषधी व्यवस्था विभाग नेपालगंज कार्यालयमा आवश्यक प्रक्रिया पुरा गरी फर्माशिष्ट राखेपछि मात्र फार्मेशी खोल्न दिने गरी निर्देशन दिईएको छ ।
फर्माशिष्ट वा फार्मेशी सहायक नराखी औषधी पसल संचालन गर्ने गरेको भेटिएकोमा बारम्बार दिईएका निर्देशनहरुको अवज्ञा गर्ने र प्रचलित कानुनमा भएको व्यवस्थाको प्रतिकुल हुने गरि औषधी पसल तथा मेडिकल हल संचालन गर्ने गरेको हुँदा अनुगमनलाई अझ कडा बनाउँदै लगिएको पुरीको भनाइ छ ।
प्रशासन कार्यालय जसपुर प्युठानका प्रमुख बाबुराम पुरी नायव सुब्बा सुकुनराज वि.क. औषधी व्यवस्था विभागका निरिक्षकहरु दिपा पौडेल तथा सृजना पोख्रेल ईलाका प्रहरी कार्यालय भिङग्रीका प्रहरी नायव निरिक्षक हस्ते बहादुर घर्ति अस्थायी प्रहरी पोष्ट चकचकेका प्रहरी नायव निरिक्षक गणेश बि.सी. लगायतको सहभागिता रहेको थियो ।