जनखोजी संवाददाता
प्युठान, लुम्बिनी प्रदेश सरकारका आर्थिक मामिला तथा सहकारी मन्त्री कृष्णध्वज खड्काले सहकारीले गरिवी निर्वारण, आर्थिक विकास र रोजगारीको सिर्जनामा महत्वपूर्ण भूमिका खेल्ने बताए । मंगलवार प्रदेश स्तरीय सहकारी वोर्डको कार्यकारी उपाध्यक्षमा टिकाराम पोख्रेललाई नियुक्त पत्र हस्तान्तरण गर्दै जनतालाई सामाजिक रुपान्तरणको बाटोमा लैजादै दिगो विकास लक्ष्य प्राप्तीको मार्गमा लैजान महत्वपूर्ण भूमिका खेल्न सुझाव दिए ।
लुम्बिनी प्रदेश मन्त्री परिषदले प्युठानका टिकाराम पोख्रेललाई कार्यकारी उपाध्यक्षमा नियुक्ती गर्ने निर्णय अनुसार आर्थिक मामिला तथा सहकारी मन्त्रालयले पोख्रेललाई नियुक्त गरेको हो । नियुक्ती पत्र ग्रहण गर्दै पोख्रेलले राज्यको तीन वटै तहका सरकारको प्राथमिकतामा परेको सहकारी क्षेत्रलाई कानुनको पालना, वित्तीय अनुशासन, सहकारी बजारीकरण र सशक्तिकरणमा भूमिका खेल्ने प्रतिवद्धता गरे । दिगो विकास लक्ष्य प्राप्ती, आर्थिक विकास, सामाजिक रुपान्तरण, गरिवी निवारण, आय र रोजगारीको बृद्धिका लागि योजना निर्माण र प्रभावकारी कार्यान्वयनको पाटोमा काम गर्ने लक्ष्य रहेको पोख्रेलको भनाइ छ ।