जनखोजी संवाददाता
प्युठान, नेत्र विक्रम चन्द विप्लव नेतृत्वको नेपाल कम्युनिस्ट पार्टी सहितका दलहरुको आव्हानमा भएको नेपाल बन्दको प्युठानको जनजीवन प्रभावित भएको छ ।
मंगलवार विहानै देखि यातायातका साधनहरु ठप्प छन् । तीन बुँदे कार्यान्वयन, एमसिसी तथा एसपीपी खारेजको माग राखेर नेपाल बन्द गर्ने घोषणा गरिएको हो । यसको समर्थनमा नेत्र विक्रम चन्द नेतृत्वको नेकपा, नेकपा, वैज्ञानिक समाजवादी पार्टी र नेकपा माओवादी समाजवादी पार्टीको समर्थन गरेको विज्ञप्ती रहेको छ ।
बजार समेत सुनसान बनेका छन् । विद्यालय तथा क्याम्पसहरु वन्द भएका छन् । यद्यपि फाट्टफुट्ट मोटरसाइकल चलेको पाइएको छ । सोमबार राती विजुवार, जुम्री, चकचके र भिंगृ क्षेत्रमा नारावाजी गरेका थिए ।
के हो तीन बुँदे ?
तत्कालिन प्रधानमन्त्री के.पी. शर्मा ओली नेतृत्वको सरकारले २०७५ फागुन २८ गते प्रतिबन्द लगाएको थियो । के.पी. शर्मा.ओली प्रधानमन्त्री भएकै वेला नेपाल सरकार र नेपाल कम्युनिस्ट पार्टी वीच २०७७ फागुन २० गते ३ बुँदे सहमति गरी २१ गते सार्वजनिक गरिएको थियो । तीन बुँदे सहमति गरेर विप्लवलाई भूमिगत रुपमा संघर्षका कार्यक्रम सञ्चालन गर्दै आएकोमा शान्तिपूर्ण आन्दोलनमा लिए भन्ने जस लिएका ओलीले तीन बुँदे सहमती गरेको ४ महिना प्रधानमन्त्री हुँदा वास्ता गरेनन् । २०७८ असार २९ गते नयाँ समिकरण सहित नेपाली काँग्रेसका सभापति शेर बहादुर देउवा प्रधानमन्त्री बने । तीन बुँदे अलपत्र, विप्लव नेतृत्वका नेता तथा कार्यकर्ता प्रतिवन्धित समयमा गरेका कार्यक्रमका विभिन्न आरोपहरुमा तारिक भोग्ने, जेल जाने समस्यामा रही रहेका छन् । तत्कालिन समयमा पक्राउका लागि बनाइएका बहानाहरुमा फसेका छन् । सोही कारण आन्दोलन, ध्यानाकर्षण र नेपाल बन्दका कार्यक्रम गरिरहेका छन् ।
वन्दको विकल्प खोज
विप्लव र सरकार वीच भएको सहमति कार्यान्वयन नहुनु, नेताहरुले एमसिसी कार्यान्वयन गरेका कारण भएको नेपाल बन्दको विकल्प खोज्न सामाजिक सञ्जालमा चर्को दवाव आएको छ । एजेण्डाहरुमा जनता तथा आम जनसमुदायको चासो भएपनि रचनात्मक खालका विरोध कार्यक्रमहरु गर्नु पर्ने तर्क रहेको छ ।