प्रदेशसभाका लागि दुवै क्षेत्रबाट कृष्ण कुमार अधिकारीको नाम सिफारिस, एमालेमा ढुक्क, गठबन्धनमा भागमा के पला भन्ने अन्यौलता

जनखोजी संवाददाता
प्युठान, जिल्लामा क्रियाशिल राजनितिक दलहरुले आगामी मंसिर ४ मा हुने संघ र प्रदेशको निर्वाचनका लागि उम्मेदवार छनौटको चरणमा छन् । नेकपा एमाले, नेपाली काँग्रेस र जनमोर्चाले अगाडि नै सिफारिस गरिसक्दा माओवादीले पनि सिफारिस गरेको छ । माओवादी केन्द्रको प्रदेश सभा निर्वाचन क्षेत्र नं. १ र २ को भेलाले संघ र प्रदेशमा उम्मेदवारका लागि योग्य नेताहरुको सूचिकरण गरी पठाएको हो ।
मंगलवार प्रदेश सभा निर्वाचन क्षेत्र नं. १, प्रदेश सभा निर्वाचन क्षेत्र नं. २ को बुधबार र बिहिबार बसेको जिल्ला समन्वय समिति प्युठानको सचिवालय बैठकले दुवै क्षेत्रबाट आएको सल्लाह सुझाव अनुसार उम्मेदवार सिफारिस गरिएको नेपाल कम्युनिस्ट पार्टी (माओवादी केन्द्र)का केन्द्रीय सदस्य तथा प्युठान जिल्ला संयोजक पित बहादुर एम.सी.ले बताए ।
माओवादी केन्द्रबाट प्रतिनिधि सभाको प्रत्यक्ष तर्फ पहिलो नम्बरमा कृष्णध्वज खड्का, नारायण प्रसाद अधिकारी, लिलामणी पोखरेल र वाइवि थापा सिफारिस भएका छन् । प्रतिनिधि सभा समानुपातिकका लागि सरस्वता न्यौपाने, सन्त बहादुर दर्लामी, उमाराम पौडेल, पुनाराम थापा, फत्यमान परियार, बोम बहादुर भण्डारी र श्रीकृष्ण रिजालको नाम सिफारिस भएका छन् ।
त्यसैगरी प्युठानको प्रदेश सभा निर्वाचन क्षेत्र नं. १ बाट प्रत्यक्ष तर्फ कृष्ण कुमार अधिकारी (प्रकाश) एकल रुपमा र प्रदेश सभा निर्वाचन क्षेत्र नं. २ बाट पहिलो नम्बरमा कृष्ण कुमार अधिकारी (प्रकाश) सिफारिस भएका हुन् । प्रदेश सभा निर्वाचन क्षेत्र नं. २ बाट प्रत्यक्षका लागि यज्ञ बहादुर के.सी. (प्रभात), रेसम बहादुर थापा, लिलाप जंग के.सी., भरत के.सी., रविन्द्र के.सी., शिव पोखरेल, राजेन्द्र भट्टराई र राम प्रसाद आचार्य सिफारिस भएका हुन् । प्रदेश सभाका लागि समानपातिक तर्फ प्युठानबाट १६ जनाको सिफारिस गरिएको छ । उमा कुमारी शर्मा, सुन्दरा के.सी., मिना पुन, अर्जुन कुमार कक्षपति, लोकनाथ बि.क., पदम थापा, रेसमा गिरी, जनक पुन, बलिराम सुनार, दुजमान राना, रेखा सुनार, टिएस गुरुङ, घन बहादुर बुढामगर, मान बहादुर थापा, नरेश्वर लम्साल र श्रीकुमार शर्मा सिफारिस भएको एम.सी.ले जानकारी दिए ।