जनखोजी संवाददाता
प्युठान, प्युठानको ऐतिहासिक स्थल भित्रिकोटमा पर्यटन प्रबर्धनका लागि भित्रिकोट दौड सम्पन्न भएको छ । वडादशै महाअष्टमी पर्बको अवसरमा “भित्रिकोट दौड” प्रतियोगिता सम्पन्न भएको हो। प्रतियोगितामा प्यूठान नगरपालिका ७ का गोबिन्द बहादुर घर्तिक्षेत्री प्रथम भएकाछन् ।
उनले ५० मिनेटमा ८ किलोमिटर उकालो दौड पूरा गरेकाहुन् । बिहान ७ः४० बजे सुरु भएको दौड गोबिन्दले ८ः३० मा पुरा गरे । यस्तै उनकै भाइ तिलक घर्तिक्षेत्रीले ५२ मिनेटमा दौड पुरागरी दोस्रो भए । प्यूठान न.पा. ९ का तेज बहादुर पुन तेस्रो भए । उनले ५३ मिनेटमा दौड पूरा गरे ।
“पर्यटन प्रबर्धनका लागि भित्रिकोट दौड” भन्ने नारा सहित प्यूठान नगरपालिका ७ स्थित सैनिक व्यारेक अगाडीबाट सुरु भएको प्रतियोगिता प्यूठान न पा ४ स्थित ऐतिहाँसिक महत्व बोकेको भित्रिकोट क्षेत्रपाल मन्दीर परिषरसम्म भएको हो । प्रतियोगितामा ३३ जनाले नामदर्ता गरेपनि १७ जना सहभागी भए । तर गन्तव्य सम्म १५ जना पुगे । प्रतियोगितामा प्रथम हुनेले १५ हजार, दोस्रो १० हजार, तेस्रो ५ हजार पुरस्कर प्राप्त गर्नेछन् । साथै दौडमा सहभागी भई गन्तव्यमा पुग्ने अन्य सबैलाई सान्त्वना ३ ३ हजार रुपैयाँ पुरस्कार प्रदान गरिएको छ । सान्त्वना हुने १२ जनालाई लुम्बिनी प्रदेशका आर्थिक मामिला तथा सहकारी मन्त्री कृष्णध्वज खड्काले आफ्नो तर्फबाट पुरस्कार प्रदान गर्ने घोषणा गरेका छन् । पुरस्कार वितरण कार्य कोजाग्रत पुर्णिमाको दिन हुने बखडी मेला समारोहमा हुने बताइएको छ ।