जनखोजी संवाददाता
प्युठान, शक्तिशाली मतको समर्थन सहित प्रधानमन्त्रीमा नेपाल कम्युनिस्ट पार्टी(माओवादी केन्द्र)का अध्यक्ष पुष्प कमल दाहाल (प्रचण्ड) प्रधानमन्त्री बनेका छन् । ३ स्वतन्त्र सहित १ सय ६९ जना सांसदको समर्थनमा आइतबार प्रधानमन्त्री पदमा नेपालको ४४ औं प्रधानमन्त्रीको रुपमा प्रचण्ड प्रधानमन्त्री भएका हुन् ।
प्रचण्डले प्रचण्डले राष्ट्रपति विद्यादेवी भण्डारी समक्ष प्रधानमन्त्रीको दाबी पेस गरेकोमा राष्ट्रपतिले नेपालको संविधानको धारा ७६ को उपधारा २ बमोजिम माओवादी केन्द्रका संसदीय दलका नेता समेत रहेका अध्यक्ष दाहाललाई प्रधानमन्त्री नियुक्त गरेको राष्ट्रपतिको कार्यालयले जनाएको छ ।
जसमा नेकपा एमालेका ७८, माओवादी केन्द्रका ३२, राष्ट्रिय स्वतन्त्र पार्टीका २०, राष्ट्रिय प्रजातन्त्र पार्टीका १४, जनता समाजवादी पार्टीका १२, जनमत पार्टीका ६, नागरिक उन्मुक्ति पार्टीका ४ र अन्य ३ स्वतन्त्र सांसदको समर्थन छ ।
राष्ट्रपति भण्डारीलाई पेस गरिएको समर्थनपत्रमा एमाले संसदीय दलका नेता केपी शर्मा ओली, माओवादी केन्द्रका दलका नेता दाहाल, स्वतन्त्र पार्टीका संसदीय दलका नेता रवि लामिछाने, राष्ट्रिय प्रजातन्त्र पार्टीका संसदीय दलका नेता राजेन्द्र लिङ्देनले हस्ताक्षर गरिएको छ । यस्तै जनता समाजवादी पार्टीका अध्यक्ष उपेन्द्र यादव, जनमत पार्टीका संसदीय दलका नेता सीके राउत, नागरिक उन्मुक्ति पार्टीका संसदीय दलका नेता रञ्जिता श्रेष्ठले हस्ताक्षर गरेका छन् । यसैगरी स्वतन्त्र सांसद प्रभु साह, किरण साह र डा. अमरेशकुमार सिंहले पनि समर्थन गरेका हुन् ।
