प्यार अलि खान
सरुमारानीमा बड्डडाँडा बृहत खानेपानीको योजनाको काम सुरु भएको छ।
लुम्बिनी प्रदेश सरकारको सहयोगमा वडा नम्बर ४ मा बृहत खानेपानी योजनाको काम सुरु भएको वडा अध्यक्ष चिन्त बहादुर सोमैले जानकारी दिए।
चालू आवमा १ करोड २० लाख बराबरको काम हुने उनले बताए। ‘यो क्रमागत योजना हो ।’ सोमैले भने, ‘अबको ३ वर्ष भित्र योजना सम्पन्न हुनेछ।’
उपल्लो बड्डडाँडामा अहिले ७५ हजार लिटर क्षमताको रिजर्व ट्यांकी निर्माण कार्य अघि बढेको छ। यस वर्ष ४ वटा ठूला रिजर्व ट्यांकी निर्माण हुनेछन्।
योजनाले उपल्लो बड्डडाँडा, बड्डडाँडा बजार क्षेत्र, बंगारी टोल, बेलडाँडा, डाँडापसल, तालपानी, बैके र अधेरीखोला बस्तीका झण्डै ३ सय २५ घरधुरी लाभान्वित हुने छन्। ‘एक घर, एक धारा वितरण गर्नेछौं।वडा अध्यक्ष सोमैले भने।
बैकेबाट पानी लिफ्ट गरी उपल्लो बड्डडाँडाको रिजर्व ट्यांकीमा पानी संकलन गरि पानी वितरण गरिने योजना बनाइएको छ। अहिलेको डिङडाङ्ग खोला खानेपानीको मूल सुक्दै गएकोले वैकल्पिक व्यवस्थाको रूपमा यस योजनालाई अघि सारिएको वडा अध्यक्ष सोमैले जानकारी गराए।