शशिधर भण्डारी
प्युठान, कोभिडकालमा ल्याइएका भेन्टिलेटर काठमाडौं सहित विभिन्न अस्पतालमा बेवारिसे बन्दा प्युठानमा भने भेन्टिलेटर अभावमा आइसियू प्रयोगमा आउन सकेको छैन् । भेन्टिलेटर र जनशक्ति अभावमा चार बेडको आइसियू कक्ष अलपत्र जस्तै बनेको हो ।
सरकारका सम्बन्धित निकायहरूलाई पटकपटक आग्रह गरे पनि सुनुवाइ नहुँदा हव अस्पतालको सेवामा प्रभावित बनेको छ ।
जिल्लामा विशेषज्ञ सेवा सहित स्वास्थ्य सेवा प्रदान गर्न सक्षम अस्पतालमा जनशक्ति र भेन्टिलेटर नहुदा आइसियु सेवा दिन नसकेको अस्पतालका निमित्त मेडिकल सुपरिटेन्डेन्ट डा. प्रमिला खनालले बताइन् । अस्पताल परिसरमा यसअघि रहेको स्वास्थ्य कार्यालय सरेपछि सोही ठाउँमा शल्यक्रिया र आइसियू कक्षहरू निर्माण गरिएको छ । यसअघि कोरोनापीडितका लागि उपचारार्थ अस्पतालमा भेन्टिलेटर भनेर ल्याइएका सामान बाइप्याप मात्रै भएको पाइएको छ । १ असोज ०७७ मा तत्कालीन स्वास्थ्यमन्त्री भानुभक्त ढकाल र तत्कालीन प्रधानमन्त्री केपी ओलीका प्रेस सल्लाहकार सूर्य थापाले भेन्टिलेटर भनेर पाँच थान बाइप्याप पठाएका हुन् । अस्पतालका अधिकृत राजन घिमिरेले श्वास–प्रश्वास सहजताका लागि बाइप्यापले काम गरे पनि आइसियूमा भेन्टिलेटर नै चाहिने बताए । प्युठान जिल्ला अस्पतालमा तीन र भिग्री प्राथमिक स्वास्थ्य केन्द्रमा दुईवटा बाइप्याप राखिएको छ ।
चार बेडको आइसियू कक्ष सञ्चालनका लागि २४ घन्टा खटिने नर्स, स्वास्थ्यकर्मी, जनरल फिजिसियन, मेडिकल अधिकृतजस्ता जनशक्ति आवश्यक पर्ने अस्पतालका निमित्त मेडिकल सुपरिटेन्डेन्ट खनालले बताइन् । हाल उपलब्ध जनशक्ति आकस्मिक र बहिरंग सेवाका लागि मात्रै पनि पर्याप्त हुन सकेको छैन । आइसियूका लागि बिरामीहरू बुटवल, भैरहवा र घोराही पुग्नुपरेको छ । अस्पतालका अनुसार आइसियूका लागि कक्ष र बेड तयारी हालतमा छन् । तर, भेन्टिलेटर र जनशक्ति नहुँदा सेवा सुरु गर्न सकिएको छैन । चार भेन्टिलेटर र केही जनशक्ति चाहियो भनेर सरकारका सम्बन्धित निकायमा भनिरहेपनि सम्बन्धित निकायका पदाधिकारीसँग अस्पताल अनुगमन, बैठक र छलफलका क्रममा समस्या समाधानका लागि माग गर्दा पाएको आश्वासन कार्यान्वयन भएको छैन् ।