रिता आचार्य
प्युठान १२ वैशाख(जनखोजी)ः यहाँका स्थानीय तहहरुले चालु खर्च घटाउँदै विकास र शिक्षा क्षेत्रमा लगानी गर्न थालेका छन् । जिल्लाको नौबहिनी गाउँपालिका र गौमुखी गाउँपालिकाले वार्षिक वजेटबाट पारित भएका चालु खर्चका कार्यक्रमहरुलाई हटाउँदै पूजीगत र दिगो विकासका कार्यक्रममा लगानी गरेको बताएका छन् ।
नौबहिनी गाउँपालिकाले आर्थिक वर्ष २०७९÷०८० को गाउँसभाबाट विनियोजित भएको १ करोड ८७ लाख ४२ हजार रकमान्तर गरेको छ । हिउँदे अभिवेशनबाट कर्मचारीहरुको पारिश्रमिक तर्फ ५० लाख,जनप्रतिनिधिहरुको पारिश्रमिक तर्फ १५ लाख, करार कर्मचारीको तलब भत्ता तर्फ १० लाख २५ हजार ,इन्धन तर्फ ७ लाख रुपैयाँ रकमान्तर भएको प्रमुख प्रशासकिय अधिकृत शिवराज पौडेलले जानकारी दिए । पौडेलका अनुसार अनुगमन मूल्याङ्कन तर्फ १५ लाख, भ्रमण खर्चतर्फ ५ लाख, किसानसंग गाउँसरकार कार्यक्रम तर्फ १० लाख, प्रशासकीय भवनमा ६० लाख, प्रशासकीय जग्गा खरिदमा २ लाख ५० हजार, सेवा र परामर्शमा ५ लाख, मर्मत सम्भार तर्फ ५ लाख ९२ हजार, गाउँघर क्लिनिक तथा साप्ताहिक क्लिनिक संचालन व्यवस्थापन तर्फ ७५ हजार रुपैया रकमान्तर गरिएको हो ।
गाउसभाबाट रकमान्तर गरिएको बजेट गाउपालिका भित्रका विभिन्न मागमा आधारित भएर बिनियोजन गरिएको गाउपालिका अध्यक्ष डिलबहादुर थापाले जानकारी दिए । अनावश्यक खर्च कटौती गरी जनताका मागमा आधारित कार्यक्रम सन्चालन गर्न लागेको थापाको भनाइ छ ।
चालु खर्च कटौती गरी गौमुखी गाउँपालिकाले शिक्षा क्षेत्रमा खर्च गर्ने भएको छ । गौमुखी गाउँपालिका गाउँसभाको १४ औं अधिवेशनबाट वैठक, अनुगमन, कर्मचारी भत्ता कटौती गरी विद्यार्थी भर्ना अभियान २०८०, शैक्षिक गुणस्तर सुधार र अत्यावश्यक भौतिक पुर्बाधार योजनाहरुमा बिनियोजन गरिएको गौमुखी गाउँपालिकाका उपाध्यक्ष महाविर रानामगरले जानकारी दिए । रानामगरका अनुसार गौमुखी गाउँपालिकाको पदाधिकारी बैठक भत्ता रु १५ लाख, अनुगमन मुल्यांकन खर्च रु १५ लाख, कर्मचारी पर्यटन काज रु २५ लाख र स्थानीय भत्ता रु १० लाख बजेट कटौती गरिएको हो ।