नौमुरे आयोजनाबाट १ हजार ४३६ घरपरिवार प्रभावित
प्यूठान । २८१.०४ मेगावाट क्षमताको नौमुरे बहुउदेश्यीय आयोजनाबाट एक हजार ४ सय ३६ घर परिवार प्रभावित हुने देखिएको छ ।
प्यूठान र अर्घाखाँचीको सिमाना ‘नौमुरे’ मा निर्माण हुने यो आयोजनाबाट १ हजार ४ सय ३६ घर प्रभावित हुने देखिएको हो ।
शुक्रबार सार्वजनिक आयोजनाको वातावरणीय प्रभाव मुल्यांकन प्रतिवेदनमा प्यूठानको सरुमारानी गाउँपालिका (१, २,३,४,५,६), ऐरावती गाउँपालिका (१, २, ३, ४, ५ र ६) र माण्डवी गाउँपालिका (१, २, ३, ४ र ५) अर्घाखाँचीको भुमिकास्थान नगरपालिका (३, ४, ५ र ६), मालारानी गाउँपालिका (५, ८ र ९), शितगंगा नगरपालिका (१, २, ३, ४, ५, ६, ७, ८, ९, १०, ११) कपिलबस्तुको शिवराज नगरपालिका (१, २ र ९), बुद्धमुभि नगरपालिका (१, २, ३, ४ र ५), विजयनगर नगरपालिका (१ र २) दाङको राप्ती गाउँपालिका ( १ र २), गढवा गाउँपालिका (१), बंगलाचुली गाउँपालिका (७, ८ र ९) का वडाहरुमा प्रभाव पर्ने उल्लेख छ । प्रतिवेदनमा उल्लेखित विषयमा राय सुझाव दिन एक हप्ताको सूचना समेत जारी गरिएको छ ।
नौमुरे बहुउदेश्यीय अन्र्तगत ३ वटा जलविद्युत आयोजनाको परिकल्पना गरिएको छ । नौमुरे जलविद्युत आयोजना, लामाताल जलविद्युत आयोजना र सुराई–नाका जलविद्युत आयोजना रहेका छन् । प्यूठानको सरुमारानी गाउँपालिका–३ र अर्घाखाँचीको शितगंगा नगरपालिका वडा नं. ७ र ८ को सिमानामा १६९ मिटर अग्लो नौमुरे बाँध बनाएर प्यूठान जिल्लाको सरुमारानी गाउँपालिका वडा नं. ३ मा विद्युतगृह निर्माण गरी २१८.३४ मेगावाट विद्युत उत्पादन गर्ने नौमुरे जलविद्युत आयोजनाको प्रस्ताव गरिएको छ । यस्तै शितगंगा नगरपालिका–७ अर्घाखाँचीको लामाताल गाउँमा रि–रेगुलेटेड बाँध बनाएर ८ मेगावाट विद्युत उत्पादन गर्ने लामाताल जलविद्यत आयोजनाको प्रस्ताव गरिएको छ ।
लामाताल जलविद्युत आयोजनाको टेलरेसबाट छोडिने केही पानीको प्रयोग गरी अर्घाखाँची जिल्लाको शितगंगा नगरपालिका हुँदै सुरुङ् मार्फत अर्घाखाँचीको शितगंगा नगरपालिका वडा नं. ११ र कपिलवस्तु जिल्लाको शिवराज नगरपालिका वडा नं. १ को सुराई खोलामा रहने विद्युतगृहबाट अधिकतम ५४.७ मेगावाट विद्युत उत्पादन गरीने सुराईनाका जलविद्युत आयोजनाको प्रस्ताव गरिएको छ ।
नौमुरे जलविद्युत आयोजनाका लागि झिलिवाङदेखि आयोजना क्षेत्रसम्म २२.९४ किलोमिटर पहुँच मार्ग निर्माण गरिनेछ । त्यसैगरि लामाताल जलविद्युतका लागि झिलिवाङ देखी आयोजना क्षेत्रसम्म २२.९४ किलोमिटर र सुराईनाका जलविद्युत आयोजनाका लागि पूर्व–पश्चिम राजमार्गबाट सर्ज ट्यांकसम्म ५.१७ किलोमिटर पहुँचमार्गको निर्माण गरिने प्रस्ताव गरिएको छ ।
लुम्बिनी प्रदेशकै ठूलो विद्युत आयोजनाको रूपमा रहेको यो आयोजना नेपाल सरकारको लगानीमा निर्माण हुने भनिएको छ ।