जनखोजी संवाददाता
प्युठान, ३१ पुस, स्वर्गद्वारी बहुमुखी क्याम्पसको सगम्रता सुधार गर्न सबै पक्ष लाग्नु पर्नेमा सरोकारवालाहरुले जोड दिएका छन् । शनिबार क्याम्पसको १२औं क्याम्पस सभामा सहभागीहरुले सो कुरा बताएका हुन् ।
क्याम्पस सञ्चालक समितिका अध्यक्ष तथा लुम्विनी प्रदेश सरकारका पुर्व अर्थमन्त्री कृष्णध्वज खड्काको अध्यक्षता तथा लुम्बिनी प्रदेशका पूर्व मन्त्री तथा प्रदेशसभा सदस्य तुल्सीराम शर्माको प्रमुख आतिथ्यतामा कार्यक्रम भएको थियो । प्रमुख अतिथि शर्माले प्रदेश सरकारले शिक्षाको विषयमा ऐनकानुन बनाउने तयारीमा रहेको जानकारी दिए । उनले ऐनकानुन बनेपछि शिक्षाको समस्याको विषयमा प्रदेशमा घचघच्याउने बताए ।
यस्तै कार्यक्रममा लुम्बिनी प्रदेशसभा सदस्य धनलक्ष्मी श्रेष्ठले स्वर्गद्धारी बहुमुखी क्याम्पस जिल्लाका अन्य क्याम्पसहरुको अभिभावक भएको बताइन् ।
क्याम्पस सञ्चालक समितीका अध्यक्ष तथा लुम्बिनी प्रदेशका पूर्व अर्थमन्त्री कृष्णध्वज खड्काले क्याम्पसलाई व्यवस्थित बनाउन समिति लागि परेको बताए । राम्रो कामको प्रसंशा र बिकृतिलाई सुझावको रुपमा लैजान सके क्याम्पसलाई सुधार गर्न सकिने खड्काले बताए । आरोपप्रत्यारोपले कहिल्यै सहि गन्तव्यमा पुग्न नसकिने खड्काको भनाइ थियो ।