२०८१ असार १५, प्यूठान । झिमरुक गाउँपालिकाका अध्यक्ष पित बहादुर महतरा क्षेत्री चडेको पालिकाको भे १ च ३९९३ नम्बरको गाडीमा आक्रमण भएको छ । उक्त गाडीको चालक माथी आक्रमण भएको हो ।
शनिवार बेलुका करिब ६ बजे तिर जिल्लाको बाग्दुला देखि मच्छी कार्यालय तर्फ जाँदै गरेको गाउँपालिकाको पिकअप चलाइरहेका चालक माथी अपरिचित व्यक्तिले एक्कासि आक्रमण गरेका छन् ।
बाग्दुला(मच्छी सडकको हाडिगैरा खण्डमा बाग्दुलाबाट आउदै गरेको पिक अपको चालक माथी एक्कसी ४ जना अपरिचित ब्यक्ति आएर आक्रमण गरेको झिमरुक गाउँपालिका अध्यक्ष पित बहादुर महतरा क्षेत्रीले जानकारी दिनुभयो । ४ जनाले आक्रमण गर्दा छेक्ने र सम्झाउने पर्यास गरेपनी ती युवाले आफ्नो कुरा नसुनेर निर्घात आक्रमण गरेको उहाँले बताउनुभयो । आक्रमणबाट चालक रेशम सुनारको आखामा गम्भीर चोट लागेको छ । उहाँले भन्नुभयो, “घाइते चालकलाई उपचारको लागि बिजुवार अस्पताल लगेर उपचार भैरहेको छ।”
आक्रमणको घटना बारे प्रहरीलाई जानकारी गराइसकेको अध्यक्ष एमसीले जानकारी दिनुभयो । घटनामा संलग्न २ जनालाई अस्थायी प्रहरी चौकी बाग्दुलाले पक्राउ गरि बिजुवर पठाएको जनाएको छ । अन्य दुई जना भागेको र उनीहरुको खोजी भैरहेको प्रहरीले जनाएको छ । आक्रमणबारे अनुसन्धान भैरहेको प्रहरीले जनाएको छ । उक्त गाडी भाडामा लिएर कार्यालय प्रयोजनका लागि प्रयोग गरिदै आएको थियो।