बबिता रिजाल, साउन १४ प्युठान ।  स्वर्गद्धारी नगरपालिका ३ जलुकेमा कृषि हाटबजार सञ्चालनमा आएको छ । किसानको उत्पादनलाई सहजै विक्री वितरण गर्नका लागि प्रत्येक सोमबार सामुहिक बजारिकरणको रुपमा हाटबजार सञ्चालन गरिएको हो ।
किसानहरुले गाउँघरमा उत्पादन गरेका बस्तुहरुलाई सहज रुपमा उपभोक्ता समक्ष पर्याउनको लागि स्वर्गद्धारी नगरपालिकाको जलुकेमा कृषि हाटबजार सञ्चालन गरिएको कृषि तथा जिविको पार्जन प्रर्वद्धन (गोल २) परियोजनाका स्वर्गद्धारी नगरपालिका संयोजक मोहन सुबेदीले बताउनु भयो । गाउँ गाउँमा पुगेर कृषकको उत्पादनलाई एकिकृत गरी बजार सम्म ढुवानी गर्ने काम स्वर्गद्धारी नगरपालिका र हेफर परियोजनाको समन्वयमा गरिएको पनि सुबेदीले बताउनुभयो । यस्तै विक्रि वितरणको सहजीकरण गोल २ ले गरेको छ ।
स्वर्गद्धारी नगरपालिकाले किसानहरुको लागी ९ वटा बालिमा न्युनतम समर्थन मुल्य पनि तोकेको छ । जस अनुसार न्युनतम समर्थन मुल्य नपाएका किसानलाई सो मुल्य र प्रतिकिलो ५ रुपैयाँ किसान प्रोत्साहन मुल्य प्रदान गर्ने गरेको स्वर्गद्धारी नगरपालिकाका कृषि अधिकृत विमल थापाले बताउनु भयो । सोही अनुरुप अघिल्लो हप्ता ४० हजार रुपैयाँ वितरण भैसकेको उहाँको भनाई छ ।
हाटबजार साउन ७ गते सोमबार देखी सञ्चालनमा आएको हो । यसको सहजीकरण प्रज्वलित सहकारीले गरेको छ । किसानलाई उत्पादन तर्फ प्रोत्साहित गर्न नगरपालिकाले कृषकको माग र आवश्यकताका आधारमा अनुदानका कार्यक्रम छनौट तथा सञ्चालन गर्नुपर्ने कृषक तथा स्वर्गद्धारी नगरपालिका बजार व्यवस्थापन समितिका अध्यक्ष पुर्ण बहादुर घर्तिले बताउनुभयो ।