अनुज पछाई

प्यूठान – प्यूठानमा तीन दिनदेखि कोरोना सङ्क्रमण देखिएको छैन । यस अवधिमा १७ सङ्क्रमणमुक्त भएको जिल्लास्थित कोभिड–१९ सङ्क्रमण नियन्त्रण रोकथाम र उपचारसम्बन्धी केन्द्र (डिसिसिएमसी) जनाएको छ । केही हप्तादेखि दैनिक रुपमा निरन्तर आरोलो लागिरहेको सङ्क्रमणदर तीन दिनयता शून्यमा झरेको हो । गत बिहीबार भने एक जनामा सङ्क्रमण देखिएको तथा १९ सङ्क्रमणमुक्त भएको केन्द्रको तथ्याङ्कले देखाएको छ । प्यूठानमा हाल १३ सक्रिय सङ्क्रमित रहेका छन् । जिल्लाको २ गाउँपालिका ऐरावति , झिमरुक तथा स्वर्गद्धारी नगरपालिका हप्तादेखि कोरोना सङ्क्रमणमुक्त भइसकेका छन् । अघिल्लो हप्तादेखि सङ्क्रमणमुक्त हुनेको सङ्ख्या भने बढिरहेको केन्द्रको तथ्याङ्कले देखाएको छ । प्यूठान नगरपालिकामा ४ गौमुखिमा ३ , मल्लरानीमा १ , सरुमारानीमा १ ,माण्डबीमा २ र नौबहिनीमा २ जना मात्रै सङ्क्रमित छन् । जिल्लामा हालसम्म ३ हजार ९१७ मा सङ्क्रमण देखिएकामा ७२ को मृत्यु भएको छ । हालसम्मका कुल सङ्क्रमितमध्ये ९८.०४ प्रतिशत अर्थात् ३ हजार ८३१ सङ्क्रमणमुक्त भइसकेका छन् । जिल्ला प्रशासन कार्यालयले गत असोज २४ गतेदेखि जिल्लाभित्र अनिश्चितकालीन ‘स्मार्ट लकडाउन’ थपेको छ । केन्द्रले समुदायमा सङ्क्रमण दर घटिरहेको तथा साप्ताहिक रुपमा मृत्युदर घटेको अवस्थामा प्यूठान ‘एल्लो–जोन’मा परेकाले स्मार्ट लकडाउन केही खुकुलो पार्दै निषेधाज्ञालाई थपिएको जनाएको छ । कोरोना सङ्क्रमणको दोस्रो लहर सुरु भएपछि गत वैशाख १७ गतेदेखि जिल्लामा निषेधाज्ञा जारी गरिएको थियो ।