जनखोजी समाचारदाता
प्युठान(२०७८ पुस २१) जिल्लाका सामुदायिक विद्यालयका शिक्षकलाई खेलकुद प्रशिक्षक प्रशिक्षण कार्यक्रम सञ्चालन गरिएको छ ।
सामाजिक विकास डिभिजन कार्यालय विजुवार प्युठानको आयोजनामा कार्यक्रमको बुधवार जिल्ला खेलकुद विकास समितिको कभर्ड हल पुण्यखोला, प्युठानमा शुरु गरिएको हो । ५ दिने कार्यक्रममा कराँते, तेक्वान्दो, भलिवल, कवड्डी र एथ्लेटिक्स खेलहरुको विषयमा प्रशिक्षण दिइने कार्यालयका अधिकृत हुतराज भट्टराईले जानकारी दिए । उनका अनुसार कवड्डीको भगवती अधिकारी, कराँते नन्दन पुन, भलिवल बल बहादुर के.सी., तेक्वान्दोको विष्णु कुमार थापा र एथ्लेटिक्स्को गुरु प्रसाद पोखरेल तथा तेजमणी पोखरेलले सहजीकरण गर्नेछन् ।
प्रशिक्षण कार्यक्रमको उद्घाटन प्रमुख विष्णु प्रसाद भुसालको अध्यक्षता, जिल्ला शिक्षा तथा समन्वय इकाई खलंगा प्युठानका प्रमुख शिवराज पण्डितको प्रमुख आथित्यता, सामाजिक विकास डिभिजन कार्यालयका अधिकृत(छैठौ) हुतराज भट्राई लगायत जिल्लाका २० विद्यालयका शिक्षकहरुको उपस्थिति रहेको थियो । कार्यक्रममा प्रत्ेयक गाउँपालिकाबाट २ र नगरपालिकाबाट ३ जनाको दरले शिक्षकहरुलाई कार्यक्रममा सहभागि गराइएको कार्यालय प्रमुख विष्णु प्रसाद भुसालले जानकारी दिए । कार्यालयको पत्र अनुसार प्रत्येक स्थानीय तहले आफ्नो पालिकामा भएका खेलकुल शिक्षकहरु मध्येबाट छनौट गरी सहभागि गराइएको छ । सहभागी शिक्षकहरुले प्रशिक्षकको रुपमा स्थानीय तहमा पुगेर काम गर्ने र खेलकुद क्षेत्रको विकासमा भूमिका खेल्ने विश्वास रहेको कार्यालय जनाएको छ ।