जनखोजी समाचार डेस्क।पश्चिम नेपालका तीन प्रमुख धार्मिक क्षेत्र गुल्मिको रेसुङ्गा, प्युठानको स्वर्गद्वारी र अर्घाखाँचीको सुपादेउराली जोड्ने गरी सार्वजनिक यातायात चलाउने तयारी गरिएको छ ।
अर्घाखाँची सुपादेउरालीबाट झिमरुक गाउँपालिका, प्युठान मच्छी हुँदै स्वर्गद्वारी तीर्थस्थलसम्म र गुल्मी तम्घासबाट झिमरुक गाउँपालिका, प्युठान मच्छी हुँदै स्वर्गद्वारीसम्म नियमित यातायात सेवा सञ्चालन गर्ने उद्देश्यले प्युठानको झिमरुक गाउँपालिकाले पहल थालेको छ ।
यसका लागि गाउँपालिकाले शुक्रबार छलफलका लागि बोलाएको छ । गाउँपालिकाले प्युठानको गौमुखी बस यातायात व्यवसायी प्रालि, अर्घाखाँचीको देउराली यातायात प्रालि र गुल्मीको गुल्मी यातायात प्रालिसँग समन्वय गरी सार्वजनिक यातायात चलाउने तयारी गरिएको हो ।
झिमरुक गाउँपालिकाका अध्यक्ष पित बहादुर महतराले धार्मिक पर्यटनलाई भित्र्याउनकाे लागि यातायातमा सहज गराउन यसरी पहल थालिएको बताएका छन् । उनले यस कदमबाट तीन जिल्लाकै धार्मिक पर्यटकीय क्षेत्रमा थप पर्यटक भित्रिने सक्ने बताए ।
