उमेरहदले तत्कालिन अखिल क्रान्तिकारीको केन्द्रीय अध्यक्षको उम्मेदवार हुनबाट बञ्चित हुनुभएका प्यूठानका विद्यार्थी नेता मिलन एसीलाई नेपाली कम्युनिष्ट पार्टी प्यूठानले प्रतिनिधी सभा सदस्य उम्मेदवारका लागि सिफारिस गरेको छ । शुक्रवार बसेको पार्टीको बैठकले एमसी सहित सात जनालाई संघीय सांसद्का लागि उम्मेदवार सिफारिस गरेको हो । ४० वर्ष मुनीका युवातर्फबाट एमसी सिफारिसमा पर्नु भएको हो ।

एमसी नेकपा माओवादीको विद्यार्थी संगठन अखिल क्रान्तिकारीको पूर्व केन्द्रीय उपाध्यक्ष हुनुहुन्थ्यो । उहाँ उक्त विद्यार्थी संगठनको केन्द्रीय सचिव, उपमहासचिवहुँदै उपाध्यक्ष  हुनुभएको थियो । विद्यार्थी संगठनको केन्द्रीय प्रवक्ता समेत भइसक्नुभएका एमसी झिमरुक गाउँपालिका–३ प्यूठान निवासी हुनुहुन्छ । अखिल क्रान्तिकारीले ३२ वर्ष माथीको नेतालाई अध्यक्ष उम्मेदवार हुनबाट रोक लगाएका कारण उहाँ बञ्चित हुनुभएको थियो।

प्यूठानबाट सिफारिस भएका सात जनामध्ये एक जनालाई पार्टीले टिकट दिनेछ । पार्टीले एमसी सहित  लिलामणि पोखरेल, कृष्णध्वज खड्का, भोजविक्रम बुढा मगर, उमाराम पौडेल, अर्जुन कुमार कक्षपती र प्रेम बहादुर विश्वकर्मा लाई उम्मेदवारका लागि सिफारिस गरेको छ ।