प्यूठान नगरपालिकाले तीन वर्षको अवधिमा नगरपालिकाभित्र ५ किलोमिटर सडक कालोपत्रे भएको जनाएको छ । ३ वर्षको प्रगति सार्वजनिक गर्दै प्यूठान नगरपालिकाले यो अवधिमा ५.०८४ किलोमिटर सडक कालोपत्रे भएको बताएको हो । यो अवधिमा सडक ढलान १.६५१ किलोमिटर भएको आर्थिक विकास समितिका संयोजक सुमनराज श्रेष्ठले बताए ।
संघ र प्रदेश सरकारसंग र स्थानीय तहले प्रस्ताव गर्ने समपुरक योजनाबाट गरिएको कालोपत्रेलाई प्यूठान नगरपालिकाले एक वडा एक कालोपत्रे नाम दिएर गौरवको आयोजना भनेको छ । एक वडा एक कालोपत्रे नाम दिएर गौरवको आयोजना भनिएको संघिय र प्रदेश समपुरक योजनाले प्यूठान नगरपालिकाको वडा नम्बर ३, ६ र ८ लाई भने समेटेको छैन ।
आयोजना अन्तरगत वडा नं १ को चेरनेटा धाईरेचौर सालघारी सडकखण्डमा प्रदेश समपुरक अनुदानबाट ४ सय मिटर सडक कालोपत्रे भएको छ।
वडा नं २ मा मुख्य सडकबाट वडा कार्यालय हुँदै ईनारचौर जाने सडकमा प्रदेश समपुरक अनुदानमार्फत २ सय ९० मिटर सडक कालोपत्रे भएको छ।
वडा नं ४ मा बिजुवार पुल देखि थापडाडा जाने सडकमा प्रदेश समपुरक अनुदानबाट आर्थिक वर्ष २०७९/०८० मा ६ सय मिटर, २०८०/०८१ मा ५ सय ९७ मिटर र २०८१/०८२ मा ५ सय ७८ मिटर सडक कालोपत्रे भएको छ।
वडा नं ५ अन्तरगत टारी जुम्रीकाढा मोटरबाटोमा प्रदेश समपुरक अनुदान मार्फत २ सय १० मिटर कालोपत्रे भएको छ।
वडा नं ७ मा स्वर्गद्धारी क्याम्पस पाखाडेरा धरमपानि भित्रिकोट खण्डमा संघीय समपुरक अनुदान मार्फत ४ सय मिटर कालोपत्रे भएको छ ।
वडा नं ९ र १० जोडने मरन्ठाना चक्रपथमा संघीय समपुरक अनुदान मार्फत आर्थिक वर्ष २०८०/०८१ मा ८ सय मिटर र २०८१/०८२ मा फरक फरक ठाउँमा गरि १ किलोमिटर ३ सय मिटर कालोपत्रे भएको छ।
प्रदेश र संघबाट आउने समपुरक अनुदानमा ५० प्रतिशत लागत रकम स्थानीय तहको साझेदारी रहेको नगरपालिकाका ईन्जिनियर प्रेम नारायण पौडेलले बताए ।
१ किलोमिटर पनि नपुगेका कालोपत्रेका टुक्रे योजना सञ्चालन गर्दा लागत धेरै हुने तर दिगो र परिणाम नदेखिने भन्दै एकठाउँको काम सम्पन्न गरेर अर्को ठाउँमा काम थाल्नुपर्ने विज्ञहरुले सुझाव दिएका छन् ।
बुधबार प्यूठान नगरपालिकाले पत्रकार भेटघाट गरि तीन वर्षे अवधिको प्रगति विवरण सार्वजनिक गरेको छ । न्यायिक समिति र पूर्वाधार विकास तर्फको प्रगति विवरण सार्वजनिक गरेको हो ।
न्यायिक समितिको प्रगति विवरण सार्वजनिक गर्दै उपमेयर देवेन्द्र वर्माले कतिपय मुद्धाहरु नगरपालिकाले देशभरकै नमुना रुपमा मेलमिलाप गराएको बताए । वर्माले सार्वजनिक गरेको प्रगति विवरणमा नगरपालिकामा हालसम्म १ सय ९६ विवद आएको जसमध्य १ सय ७० मेलमिलापमार्फत टुंगिएको, २ वटा फैसला गरिएको र २४ वटा प्रक्रियामा रहेको उल्लेख छ ।
गत आर्थिक वर्षको तथ्यांक अनुसार प्यूठान नगरपालिकामा लैंगिक हिंसा र घरेलु हिंसाका विवाद ४० प्रतिशत रहेका छन् । सोहि आर्थिक वर्षमा नगरपालिकाले समुदाय र विद्यालय तहमा न्यायिक सचेतना कार्यक्रममा ९ सय १० जना सहभागि भएको वर्माले बताए ।
नगर प्रमुख विष्णु बहादुर योगीको अध्यक्षतामा भएको कार्यक्रमको सञ्चालन निमित्त प्रमुख प्रशासकीय अधिकृत गोविन्द राज घिमिरेले गरेका थिए ।
