जनखोजी संवाददाता
प्युठान।लुम्बिनी प्रदेश सरकारका उद्योग तथा यातायातमन्त्री सरोज थापा(रोज राणा)ले खेलकुद राष्ट्रको गहना भएको बताउनुभयो । प्युठान नगरपालिकाले शुक्रबार सुरु गर्न थालेको नगरपालिकास्तरीय अन्तर मावि चौथो राष्ट्रपति रनिङशिल्ड प्रतियोगितालाई सम्बोधन गर्दै थापाले खेलको माध्यमबाट विद्यालय, जिल्ला प्रदेश हुँदै देशलाई चिनाउन सकिने जिकिर गर्नुभयो ।

प्यूठान नगरपालिकाको चौथो राष्ट्रपति रनिङ शिल्ड प्रतियोगिता सुरु भएको छ । “राष्ट्रका लागि खेलकुद, स्वास्थ्यका लागि खेलकुद” भन्ने नाराका साथ गणतान्त्रिक खेलकुद मैदान बिजुवारमा शुक्रबार खेलकुदको उद्घाटन गरिएको छ । खेलमा अनुसाशनपूर्वक खेल्न उहाँले सुझाव दिनुभयो । खेलका लागि खेल मैदान आवश्यक हुने भएकाले यसको पूर्वाधार विकास गर्न आफु लागि पर्ने प्रतिवद्धता व्यक्त गर्नुभयो ।

कार्यक्रममा लुम्बिनी प्रदेश सांसद धन लक्ष्मी श्रेष्ठ, जिल्ला समन्वय समिति प्रमुख धरम बहादुर जि.सि., प्रमुख जिल्ला अधिकारी नारायण प्रसाद अर्यालले शुभकामना मन्तव्य राख्नुभएको थियो ।
प्रतियोगितामा ३ संस्थागत र ११ सामुदायिक गरी १४ विद्यालय सहभागि भएका छन् । ५ विधामा सञ्चालन हुने प्रतियोगितामा २४ वटा खेल समावेश गरिएको नगरपालिकाले जनाएको छ ।
नगरप्रमुख बिष्णु बहादुर योगिको अध्यक्षतामा सुरु भएको कार्यक्रममा स्वागत मन्तव्य प्यूठान नगरपालिकाका उपप्रमुख देवेन्द्र बर्माले गर्नुभएको थियो ।