केशर सुनार
जेठ ३१, प्यूठान (जनखोजी):प्यूठानको प्यूठान नगरपालिकाले आफ्ना पालिकाअन्तर्गतका दुर्गम बस्तीमा नि:शुल्क विशेषज्ञ स्वास्थ्य शिविर सञ्चालन गरिरहेको छ।बुधबार प्यूठान नगरपालिकाको स्वास्थ्य शाखाको आयोजनामा वडा नं-८ काे दुर्गम बस्ती भेडावारीमा एकदिने नि:शुल्क विशेषज्ञ स्वास्थ्य शिविर सञ्चालन गरिएकाे हाे ।
विशेषज्ञ चिकित्सकसहितका स्वास्थ्यकर्मीको टोलीले नगरपालिका अन्तर्गत रहेका दुर्गम वस्तीमा रहेका जनताहरुको हरेक ठाउँ-ठाउँमा शिविर सञ्चालन गरि निःशुल्क स्वास्थ्य सेवा उपलब्ध गराउने स्वास्थ्य शाखा प्रमुख गोविन्द घिमिरेले बताए। आफ्नो पालिकाका नागरिकलाई आफ्नै गाउँठाउँमा निःशुल्क स्वास्थ्य सेवा उपलब्ध गराई दैनिक जीवनयापनमा सहयोग पुर्याउने उद्देश्यले नि:शुल्क विशेषज्ञ स्वास्थ्य शिविर आयोजना गरिएको हो।
नगरपालिकाको वडा नं-८ भेडाबारीको श्री नेपाल राष्ट्रिय प्राथमिक विद्यालय भेडाबारीमा सम्पन्न भएको नि:शुल्क स्वास्थ्य शिविरमा १ सय १५ जनाले स्वास्थ्य सेवा लिएका छन्।त्यसमध्ये ८५ जना महिला र ३० जना पुरुषले स्वास्थ्य परिक्षण गराएका हुन् ।शिविरमा १५ जना महिलाको पाठेघरको मुखको क्यान्सर जाँच,३५ जना महिलाको स्कृनिङ पाठेघरको समस्याको चेकजाँच गर्दा ५ जना पाठेघर खसेका बिरामीको परिक्षण गरी उपचार गरिएको छ।त्यस्तै ९३ जना बिरामीको सुगर जाँच गर्दा ५ जना सुगर भएका बिरामी पत्ता लागेका छन।१५ जना ब्लड प्रेसर बढी भएका बिरामी,१ जना गर्भवती महिलाको भिडियो एक्सरे,३५ जना ग्यास्ट्रीकका बिरामी,४२ जना हाडजोर्नी तथा नसा सम्बन्धि समस्या भएका बिरामीको उपचार गरि औषधि वितरण गरिएको छ।
शिविरमा नाक,कान,घाँटी,दम,खोकी र टाउको दुखेको सहित सामान्य स्वास्थ्य जाँच समेत गरिएको छ।स्वास्थ्य परिक्षण गरिएका बिरामीलाई उपचार एवम् औषधि वितरण गरिएको छ।साथै आवश्यक समन्वयका लागि जिल्ला अस्पताल प्यूठानमा जानकारीका निम्ति आग्रह गरिएको शाखाले बताएको छ।
ग्रामीण भेगका नागरिकलाई घरदैलोमै स्वास्थ्य सेवा दिने उद्देश्यले स्वास्थ्य शिविरको आयोजना गरिएको र धेरैभन्दा धेरै नागरिकले लाभ लिनुपर्ने प्रमुख अतिथि एवम् जिल्ला अस्पताल प्यूठानका हाडजोर्नी तथा नसा रोग विशेषज्ञ डा.राजेन्द्र पौडेलले बताए।डा.पौडेलले नगरक्षेत्रमा शिक्षा,स्वास्थ्य र पूर्वाधारको क्षेत्रमा नगरपालिका विशेष जोडबलका साथ लागेकोमा पालिकालाइ धन्यवाद दिदै नागरिकहरुलाई शिविरबाट लाभान्वित हुन आग्रह गरेका छन।
वडाध्यक्ष पदम बहादुर थापाले नगरपालिकाले नि:शुल्क शिविर सञ्चालन गरेकोमा धन्यवाद दिदै आफ्ना वडाका सम्पूर्ण नागरिकहरु लाभान्वित हुन सक्ने बताएका छन।
नि:शुल्क विशेषज्ञ स्वास्थ्य शिविरमा जिल्ला अस्पताल प्यूठानका हाडजोर्नी तथा नसा रोग विशेषज्ञ डा.राजेन्द्र पौडेल,नगरपालिकाका स्वास्थ्य शाखा प्रमुख गोबिन्द घिमिरे,सोही वडाका वडाध्यक्ष पदम बहादुर थापा,जिल्ला अस्पताल प्यूठानका विशेषज्ञ लगायत स्वयंसेविकाहरुको उपस्थिति रहेको थियो।औपचारिक कार्यक्रमको सञ्चालन भने नगरप्रमुखको स्वकिय पुष्कर शर्माले गरेका हुन।
