जनखोजी संवाददाता
प्युठान, नेत्र विक्रम चन्द नेतृत्वको नेपाल कम्युनिस्ट पार्टीको भातृ संगठन युवा संगठन नेपालका केन्द्रीय सचिवालय सदस्य तथा लुम्बिनी प्रदेश इन्चार्ज हरी बस्नेत नेपाल कम्युनिस्ट पार्टी ( माओवादी केन्द्र)मा प्रवेश गरेका छन् । जनयुद्धकाल देखि माओवादी आन्दोलनमा जोडिएर थुप्रै संघर्षमा भूमिका खेलेका बस्नेत अन्ततः पुरानै घरमा फर्केका हुन् । उनी जनयुद्धकाल देखि नेकपा (माओवादी), नेकपा(माओवादी ) वैद्य हुँदै विप्लवको विभाजन संगै नेपाल कम्युनिस्ट पार्टीमा पुगेका थिए ।
त्यसैगरी मोहन वैद्य नेतृत्वको नेपाल कम्युनिस्ट पार्टी( माओवादी क्रान्तकारी)का मगरात राज्य कमिटि सदस्य तथा युवा नेता सुवोध के.सी. (विश्व) पनि मंगलवार नै माओवादी केन्द्रमा समाहित भएका हुन् । उनीपनि जनयुद्ध कालदेखि माओवादी हुँदै वैद्यको विभाजन पछि नेकपा ( माओवादी क्रान्तकारी)मा सक्रिय थिए ।
वुधवार बुटवलमा आयोजित एक कार्यक्रममा माओवादी केन्द्रका केन्द्रिय सचिव तथा लुम्विनी प्रदेश इन्चार्ज चक्रपाणी खनाल बलदेव, स्थायी समिति सदस्य तथा लुम्विनी प्रदेशका मुख्यमन्त्री कुल प्रसाद केसी, प्रदेश अध्यक्ष सुदर्शन वराल, केन्द्रिय सदस्य तथा प्युठान जिल्ला इन्चार्ज नारायण अधिकारी, प्रदेश समितिका उपाध्यक्ष लुमाकान्त न्यौपाने, सचिव कृष्ण अधिकारी, कोषाध्यक्ष निर्दाेश अलि, प्रदेश सचिवालय सदस्य एवं चन्द्रकोट गाउपालिकाका अध्यक्ष युवराज केसी लगायतका नेताहरुले स्वागत गरेका थिए ।
माओवादी प्रवेश गरेका युवा नेताहरु जिल्लामा लोकप्रिय युवा नेताको रुपमा चिनिन्छन् । लामो संघर्ष र आन्दोलनहरुको उपलब्धिलाई रक्षा गरी समाजवाद निर्माणका लागि माओवादी शक्तिहरु एक ढिक्का नभई नहुने हुँदा आफुहरु पुरानो पार्टीमा फर्केको उनीहरुको धारणा छ ।
जनयुद्धबाट प्राप्त भएका उपलब्धिको रक्षार्थ एकताबद्ध भई लागेको सन्देश दिनका लागि पनि आफुहरु माओवादी केन्द्रमा जोडिएको र सवैलाई जोडिन युवा नेता बस्नेत अपिल गरे ।
कार्यक्रमा केन्द्रिय सचिव तथा लुम्विनी प्रदेश इन्चार्ज चक्रापानी खनालले माओवादी केन्द्रले जनताको एजेण्डा बोकेकाले पार्टीका आकर्षण वढेको बताए ।
नेपाल कम्युनिस्ट पार्टी (माओवादी केन्द्र)का लुम्बिनी प्रदेश सचिव कृष्ण कुमार अधिकारी (प्रकाश)ले प्रवेश गरेका युवा नेताहरुलाई सम्मान जनक जिम्मेवारी दिने बताए ।
