जनखोजी संवाददाता
प्युठान, झिमरुक गाउँपालिकाले गत आर्थिक वर्षको स्वास्थ्य क्षेत्रको प्रगतिमा प्रथम स्थान हासिल गरेको छ । स्वास्थ्य कार्यालय प्यूठानले हिजो र आज आयोजना गरेको स्वास्थ्य कार्यक्रमहरुको जिल्ला स्तरीय वार्षिक समीक्षा कार्यक्रममा उक्त स्तर निर्धारण गरिएको हो ।
झिम्रुक गाउँपालिकाले महत्वपूर्ण सूचकमा प्राप्त गरेको प्रगतिको आधारमा प्रदेश स्वास्थ्य निर्देशनालयले तयार गरेको मूल्यांकन मापदण्डका बमोजिम मूल्याकंन गरिएको स्वास्थ्य कार्यालयका कोल्डचेन निरीक्षक कोशलराज बैद्यले जानकारी दिए । उत्कृष्ट हुने झिमरुक गाउँपालिकाका स्वास्थ्य शाखा प्रमुख विकास के.सी.लाई दोसल्ला र प्रमाण पत्रले सम्मान गरिएको थियो । समीक्षामा नौ वटै पालीका तथा सहयोगी संघ संस्था र जिल्लाको समग्र प्रगति प्रतिवेदन प्रस्तुत गरिएको थियो । गत आर्थिक वर्षमा जिल्लामा परिवार नियोजनको साधन प्रयोग गर्ने संख्या वृद्धि भएको देखिएको छ ।
स्वास्थ्य कार्यालय प्युठानको आयोजनामा आ.व.०७८÷०७९ को स्वास्थ्य सस्था स्तरिय समीक्षा दुई दिने गोष्ठी बुधबार समापन भएको छ ।जिल्ला समन्वय समितिका प्रमुख श्री धरम बहादुर जि.सी.को प्रमुख आथित्यता , प्रमुख जिल्ला अधिकारी सुनिता नेपाल आथित्यता, प्रहरी नायब उपरिक्षक सत्यनारायन थापा, लुम्बिनी प्रदेश स्वास्थ्य निर्देशनालय तथ्यांक अधिकृत डोर बहादुर बस्नेत, नगरपालिका र गाउँपालिका स्वास्थ्य शाखा प्रमुख , स्वास्थ्य क्षेत्र कृयाशिल गैरसरकारी संस्थाका प्रमुखको उपस्थित रहेको थियो ।