जनखोजी संवाददाता
प्यूठान, लुम्बिनी प्रदेशव्यापी अन्तरस्थानीय तह पुरुष भलिवल प्रतियोगिता २०८० अन्तरगत नौबहिनी गाउँपालिकाको प्रथम अध्यक्षकप बर्दाघाट नगरपालिकाले जितेको छ ।
मंगलबार नौबहिनी गाउँपालिका–६ बहाने स्थित खेलमैदानमा भएको अन्तिमखेलमा सरुमारानी गाउँपालिकालाई हराउँदै बर्दाघाट विजयी भएको हो । यो संगै सरुमारानी गाउँपालिका दोश्रो र सुनिल स्मृति गाउँपालिका तेश्रो बनेको छ ।
मंगलबार सम्पन्न खेलमा प्रथम, द्धीतीय र तृतीय हुनेलाई क्रमशः रु एक लाख ५० हजार, रु एक लाख र रु पचास हजार मेडल, ट्रफि र प्रमाणपत्र प्रदान गरिएको नौबहिनी गाउँपालिकाले जनाएको छ ।
आइतबार देखि शुरु भएको भलिवल प्रतियोगितामा प्युठान, रोल्पा, दाङ र पश्चिम नवलपरासी जिल्लाका ११ टिम खेलाडीहरुको सहभागिता रहेको थियो ।
गाउँपालिकाको २०८०÷०८१ को स्वीकृत वार्षिक बजेट अनुसार लुम्बिनी प्रदेशव्यापी अन्तरस्थानीय तह पुरुष भलिबल प्रतियोगिताको रुपमा प्रथम अध्यक्ष कप २०८० को आयोजना गरिएको नौबहिनी गाउँपालिकाका प्रमुख प्रशासकीय अधिकृत शिवराज पौडेलले जानकारी दिनु भयो ।
पछिल्लो समय प्युठानका स्थानीय तहहरुले भलिवल खेललाई प्रोत्साहन गरेका छन् । मंसिर १४ गते जिल्लाकै माण्डवी गाउँपालिकाले राष्टव्यापी भलिवल प्रतियोगिता आयोजना गरेको थियो ।