शान्ति सुनार
चैत्र ३ ,कोहलपुर।सुर्खेतकी इनिशा बिकको बलात्कारपछि हत्या भएको घटनामा न्यायको माग गर्दै यतिबेला विभिन्न स्थानमा विरोध प्रदर्शन तीव्र बन्दै गएको छ। पछिल्ला केही दिनदेखि कोहलपुरमा पनि निरन्तर शान्तिपूर्ण प्रदर्शन भइरहेका छन्।

सुर्खेतको गुर्भाकोट घर भई वीरेन्द्रनगरमा बस्दै आएकी इनिशाको गत फागुन २४ गते, अन्तर्राष्ट्रिय नारी दिवसकै दिन बलात्कारपछि हत्या गरिएको थियो। उक्त घटनामा संलग्न रहेको आरोपमा प्रेमी भनिएका एक युवकसहित ४ जनालाई प्रहरीले पक्राउ गरिसकेको छ।

तर, घटना भएको लामो समय बितिसक्दा समेत सरकारको तर्फबाट ठोस कदम नचालिएको भन्दै नागरिक स्तरबाट आक्रोश बढ्दो छ। यही कारण विभिन्न व्यक्ति तथा संघ–संस्थाहरूले देशका विभिन्न स्थानमा विरोध प्रदर्शन गरिरहेका छन्।

यसै क्रममा कोहलपुरमा पनि कोहलपुर युवा क्लब सञ्जाल र किशोरी क्लब सञ्जाल लगायतका संस्थाहरूको नेतृत्वमा शान्तिपूर्ण प्रदर्शन भइरहेको छ। प्रदर्शनमा सहभागी युवाहरूले दोषीलाई कडा कारबाही गर्न, पीडितलाई न्याय दिलाउन र यस्ता घटनाहरू दोहोरिन नदिन राज्यले प्रभावकारी भूमिका खेल्नुपर्ने माग गरेका छन्।

प्रदर्शनकारीहरूले “न्याय देऊ”, “दोषीलाई कारबाही गर” जस्ता नाराबाजी गर्दै शान्तिपूर्ण रूपमा आफ्नो आवाज उठाइरहेका छन्।