शशिधर भण्डारी समृद्ध
प्युठान, प्युठानमा पर्यटन विकासका सम्भावनाका धेरै भएको एक कार्यक्रममा सहभागिहरुले दावी गरेका छन् ।
शुक्रबार लुम्बिनी प्रदेश सरकार पर्यटन, ग्रामीण तथा शहरी विकास मन्त्रालय, पर्यटन विकास परिषद, मुकाम बुटवलको आयोजना र प्युठान उद्योग वाणिज्य संघको सहआयोजनामा भएको प्युठान जिल्लामा दिगो पर्यटन विकासका सम्भावनाहरु विषयक एक दिने गोष्ठीमा सहभागिहरुले सो कुरा बताएका हुन् ।
जिल्लाको पर्यटकीय क्षेत्रको विकासमा छलफल गर्दै जिल्ला स्थित सरोकारवालाहरुको भनाई के छ ? हेर्नुहोस ।
पर्यटन प्याकेज निर्माणमा ध्यान दिनु पर्दछः प्रजिअ नेपाल
जिल्ला प्रशासन कार्यालय प्युठानका प्रमुख जिल्ला अधिकारी सुनिता नेपालले जिल्लाले भित्रिएका पर्यटकहरुबाट लाभ लिन नसक्नु जिल्लाको कमजोरी रहेको तर्क राखिन । उनले जिल्लाको पर्यटक विकासका लागि स्वर्गद्धारी संगै अन्य क्षेत्रमा पुराउनका लागि प्याकेज निर्माणमा स्थानीय सरकार, होटल तथा पर्यटन व्यवसायीहरुले ध्यान दिनु पर्नेमा नेपालको जोड थियो ।
मुख्य सडक नै समस्याः गौमुखी अध्यक्ष गिरी
जिल्लाको विकासका लागि भालुवाङ देखि बाग्लुङ, गुल्मी जोड्ने सडकहरुको स्तरीय निर्माण गर्नु पर्ने गौमुखी गाउँपालिकाका अध्यक्ष विष्णु कुमार गिरीले बताए । गिरीले पर्यटन क्षेत्रमा ठुलो लगानी गर्न नसकेपनि साना लगानीका अवसरहरु समेत गरेको दावी गरे । उनले पर्यटन प्रवर्धनका लागि जिल्लामा पर्यटकीय चेतनाको बृद्धि गर्न सबै लाग्नु पर्नेमा जोड दिए ।
पर्यटक भित्र्याउने वातावरण निर्माणमा एकताबद्ध हुनुपर्दछः जिसस प्रमुख जि.सी.
जिल्लामा विधिवत रपमा पर्यटक भित्र्याउने वातावरण निर्माणमा एकताबद्ध हुनुपर्ने जिल्ला समन्वय समिति प्युठानका प्रमुख धरम जि.सी.ले बताए । जि.सी.ले होटलमा खाना, यातायातमा सहज र गुणस्तरीय सेवामा ध्यान दिनु पर्ने बताए ।
पर्यटकीय पूर्वाधार निर्माणमा जोड दिएका छौंः झग बहादुर विश्वकर्मा
सरुमारानी गाउँपालिकाका अध्यक्ष झग बहादुर विश्वकर्माले पर्यटकीय पूर्वाधार निर्माणमा जोड दिएको दावी गरे । स्थानीय तहको लगानीले मात्रै पर्यटन प्रवर्धन हुन नसक्ने भन्दै उनले संघ र प्रदेशले नीतिगत र आर्थिक रुपमा सहजीकरण गर्नु पर्ने बताए । नेपालको पर्यटन विकासमा असन्तुलित भएको उनको भनाइ छ । विश्वकर्माले नेपालको पर्यटन क्षेत्रको विकासका हिसावले पश्चिम भन्दा पूर्व अगाडि रहेको बताउदै राज्यले पर्यटन विकासमा सन्तुलित गराउनु पर्नेमा जोड दिए । पर्यटन विकासमा प्रदेश सरकारले ठुलो वजेट नवानाई साना साना लगानी मात्रै गरेकोले पर्यटन विकासमा समस्यामा भइरहेको उनको आरोप छ ।
पर्यटनलाई आर्थिक विकासको रुपमा लिएनौः व्रह्मा
प्युठान नगरपालिकाका नगरउपप्रमुख देवेन्द्र बह्माले पर्यटकीय स्थलहरुको प्रवर्घनका लागि प्रचार प्रसार र महोत्सवको आयोजना हुनु पर्ने बताए । पर्यटकीय गन्तब्यको नियमित प्रचार प्रसारको अभावका कारण नियमित आउने पर्यटकहरुको दर घट्ने गरेको उनको दावी छ । ब्रह्माले पर्यटकीय स्थलहरुमा आएको संख्याको तथ्यांक संकलन हुने पर्ने उनको तर्क छ । उनले पर्यटकको आकर्षणका लागि होटल व्यवसायीले प्याकेज निर्माण गर्न अनुरोध गरे ।
लगानीको वातावरण सिर्जना गरौंः पत्रकार भण्डारी
नेपाल पत्रकार महासंघ जिल्ला शाखा प्युठानका निवर्तमान अध्यक्ष गिरु प्रसाद भण्डारीले जिल्लामा पर्यटन प्रवर्धनका लागि लगानीको वातावरण निर्माण गर्नुपर्ने बताए । भण्डारीले लाख लगानी गरे करोडको आम्दानी हुने योजना निर्माणमा सरोकारवालाहरुलाई सुझाव समेत दिए ।
प्युठानले पर्यटक देख्ने अवसर पाएनः पर्यटन उपाध्यक्ष भण्डारी
प्युठान उद्योग वाणिज्य संघका पर्यटन उपाध्यक्ष दधिराम भण्डारीले स्वर्गद्धारीबाट पर्यटनलाई प्युठानको उत्तरी क्षेत्रमा पर्यटन नल्याउँदा प्युठानले पर्यटकहरुबाट लाभ लिन नसकेको बताए । प्युठानको नौबहिनी र गौमुखीसम्म पुर्याउन सके जिल्लाले लाभ लिने भन्दै यसको विकासका लागि सबैको पहल हुनु पर्नेमा उनको जोड थियो ।
लुम्बिनीका पर्यटकीय स्थलको प्रोफाइल निर्माण गरी विकास गर्ने योजना छ: जोशी
लुम्बिनीका पर्यटकीय स्थलको प्रोफाइल निर्माण गरी विकास गर्ने योजना रहेको पर्यटन विकास परिषद, मुकाम बुटवलका कार्यकारी निर्देशक रामु जोशीले जानकारी दिए । जोसीका अनुसार लुम्बिनी पर्यटन विकास परिषदले जिल्लालाई पर्यटकीय हवको रुपमा विकास गर्न पर्यटनको प्रकारको वर्गिकरण गरी डिजिटल वुष्टिङको तयारी गरिरहेको छ ।
सरकारी उल्झन कम भए सहजः भारती
प्युठान उद्योग वाणिज्य संघका पूर्व अध्यक्ष इमान सिंह भारतीले पर्यटन व्यवसायमा सरकारी उल्झन बढि भएकोले पर्यटन व्यवसायमा समस्या देखिएको गुनासो गरे । उनले पर्यटन विकास परिषद, मुकाम बुटवललाई यसमा सहजीकरण गर्ने विश्वास व्यक्त गरे । प्युठानमा पर्यटन पूर्वाधार निर्माणका लागि दर्ता पक्रियाको झन्जटीलो प्रावधानले जिल्लामा निर्माण हुन थालेका पूर्वाधार निर्माणमा समस्यामा परेको उदाहरण समेत प्रस्तुत गरे । प्युठानको पर्यटन विकासमा गन्तब्यको रुपमा निश्चित पर्यटकीय स्थलहरुको सूचिकरण गरी गुणस्तरीय पूर्वाधार निर्माणमा जुट्नु पर्नेमा जोड दिए । भारतीले भने “प्युठानको पर्यटनको बिकास गर्ने हो भने स्वर्गद्वारी लाई पर्यटन बिकास समिति गठन गरि ९ वटै स्थानीय तहका एक एक मुख्य गन्तव्य पहिचान गरौ र ब्यबस्थित गरौ।”
हाम्रो पर्यटकीय स्थल डिजिटल मिडियामा देखिएनन्ः प्रविण बि.क.
युवा व्यवसायी प्रविण वि.क.ले लक्षित पर्यटकहरु आउन जिल्लाका पर्यटकीय स्थलहरुलाई डिजिटल मिडियामा देखिने गरी प्रचार प्रसारमा लाग्नु पर्नेमा जोड दिए । उनले नेपाल भित्रिने पर्यटकहरुलाई लक्षित गरी देश अनुसार सबै भन्दा बढी प्रयोग हुने सामाजिक तथा डिजिटल मिडियाको प्रयोग गर्न सुझाए ।
पर्यटकलाई हेर्ने दृष्टिकोण बदलौंः व्यवसायी कक्षपति
प्युठान उद्योग वाणिज्य संघका निवर्तमान अध्यक्ष तथा व्इसायि केदारमान कक्षपतिले पर्यटकीय क्षेत्रको विकासका लागि पर्यटकलाई हेर्ने दृष्टिकोण बदल्नु पर्नेमा जोड दिए । जिल्लामा पर्यटन विकासका लागि प्रकृतिले साथ दिएपनि यातायातको सहज पहुँच, विदेशी पर्यटकहरुलाई गरिने व्यवहारमा सकारात्मक परिवर्तन गर्नु पर्ने कक्षपतिको भनाइ थियो ।
