जनखोजी संवाददाता
प्युठान, सहकारी विकास वोर्ड लुम्बिनी प्रदेशले सहकारी विकास योजना निर्माण प्रभावकारी बनाउने भएको छ । बुधबार बोर्डको वैठकले विकास कार्ययोजना निर्माण तथा सुधार गर्नु पर्ने ऐन, नियमावलीहरुको सुधारका लागि सुझाव पेश गर्ने गरी तयारी गरेको हो ।
वैठकले लुम्बिनी प्रदेश सहकारी विकास वोर्डका कार्यकारी उपाध्यक्ष टिकाराम पोख्रेलको संयोजकत्वमा सहकारी ऐन, नियमावली नीति तथा कार्यविधिमा आवश्यक संशोधन मस्यौदा तयारी समिति समेत गठन गरिएको छ । जस्को सदस्यहरुमा प्रदेश सहकारी संघका अध्यक्ष प्रेम प्रसाद सुवेदी, दर्ता अधिकारी भिम प्रसाद तिवारी, चार्डट एकाउन्टेट पदम भट्टराई र सहकारी महाशाखा प्रमुख प्रेम प्रसाद आचार्य रहेको सहकारी विकास वोर्डका कार्यकारी उपाध्यक्ष टिकाराम पोख्रेलले बताए ।
सहकारी संघ तथा संस्थाहरुको अनुसन्धान सघन अनुगमन, ऐनको प्रभावकारी कार्यान्वयन गर्न, वार्षिक वजेट वाडफाँड, अनुगमन र नियमन प्रभावकारी बनाउन संबन्धित कार्यालयलाई सुझाव प्रदान,
सहकारी संस्थामा भएको वित्तिय विचलन, सुशासनको अभाव, आन्तरिक नियन्त्रण प्रणाली, अनुदानको प्रभावकारी कार्यान्वयनका विषयमा छलफल भएको कार्यकारी उपाध्यक्ष पोख्रेलले जानकारी दिए ।
अर्थ तथा सहकारीमन्त्री कृष्ण ध्वज खड्काको अध्यक्षतामा सम्पन्न बैठकले सहकारी संघसस्थाहरूको प्रभावकारी सञ्चालन, अनुगमन, नियमन, उत्पादन बजारिकण लगायतका बिषयमा सरकारको भूमिका थप प्रभाबकारी बनाउन सुझाउने निर्णय समेत गरेको हो ।
सहकारी विकास वोर्ड अन्तरगत तीन निकाय रहेका छन् । सहकारी दर्ता अधिकारीको कार्यालयले सहकारी दर्ता, सञ्चालन र नियमन, सहकारी प्रशिक्षालयः तालिमहरु सञ्चालन र सहकारी महाशाखा ले सहकारीहरुलाई अनुदानको कामहरु गरिरहेकाछन् ।