सिपि पौडेल
प्युठान, स्वर्गद्वारी नगरपालिकाले वडा स्तरीय एकीकृत स्वास्थ्य शिविर सञ्चालन गरेको छ । समाचार तयार पार्दासम्म स्वर्गद्धारीमा सञ्चालन भएको घुम्ति शिविरबाट एक हजार ३ सय ९५ जना लाभान्वित भएका छन् ।
दुरदराजमा रहेका नागरिकलाई स्वास्थ्य सेवाको सहज पुहँचका लागि वडा स्तरमा घुम्ति शिविर सञ्चालन गरिएको नगरपालिकाका प्रमुख प्रशासकीय अधिकृत तुल्सीराम गैरेले जानकारी दिए ।
शिविरबाट स्वास्थ्य सेवाको पहुँच र नगरपालिकाबासीको स्वास्थ्य अवस्थाको विषयमा सर्वेक्षण हुने नगरपालिकाका स्वास्थ्य शाखा प्रमुख दल बहादुर के.सी.ले जानकारी दिए । उनका अनुसार माघ २७ गते देखि सुरु भएको शिविरमा वडा नं १ बाट ३ सय १८ जना, वडा नं २ बाट ४ सय ३९, वडा नं ३ बाट ३ सय ३७ , र वडा नं ४ बाट ३ सय १ गरि १ एक हजार ३ सय ९५ जनाले स्वास्थ्य सेवा लिएका छन ।
यस्तै मंगलवार वडा नं ५ को उमा महेश्वरी माध्यामिक विद्यालय सारी, बुधबार वडा नं ६ को सुर्योदय माध्यामिक विद्यालय बेल्वास, विहिवार बेल्वास माध्यामिक विद्यालय तापा , शुक्रबार वडा नं ८ जनता माध्यामिक विद्यालय बर्जीवांङ र आइतबार वडा नं ९ विद्यानन्द माध्यामिक विद्यालय जुडापाटा शिविर संचालन पालिकाले जनाएको छ ।
स्वास्थ्य शिविरमा प्रेसर र सुगर परिक्षण, महिलाहरुको पाठेघरको मुखको क्यान्सर अवस्था, वालवालिकाको कुपोषण अबस्था, गर्भवती अवस्थाको बारेमा चेकजाँच र जेष्ठ नागरिकको निःशुल्क स्वास्थ्य विमा समेत गरिएको छ । सबै वडामा शिविर सम्पन्न पश्चात सर्वेक्षणमा आएका बिरामीको अवस्था अनुसार नयाँ रणनीतिका साथ अगाडी बढ्ने नगरपालिकाको योजना रहेको नगर प्रमुख टेक प्रसाद भण्डारीले जानकारी दिए ।