जनखोजी
प्युठान, नौबहिनी गाउँपालिका–५ सानो डामृमा मदिरा सेवन र प्रयोगमा निषेध गरिएको छ । स्थानीय टोल विकास संस्था र क्लवले स्थानीय मेला, विवाह तथा गाउँमा हुने कुनै पनि कार्यक्रममा मदिरा विक्री, सेवनमा रोक लगाउने निर्णय गरेको हो ।
स्थानीय देउराली युवा क्लब र सानो डामृ टोल विकास संस्थाको आयोजनामा बसेको संयुक्त बैठकले मदिरापानले सामाजिक विकृति बढेको भन्दै सो कार्यहरू बन्द गर्ने निर्णय गरेको जनाएको छ । पत्रकार तेजेन्द्र वि.एम.का अनुसार बैठकले साविक डामृ गाविस वडा नं. १ र २ अन्तर्गतको क्षेत्रभित्र पर्ने सम्पुर्ण घरधुरीमा लागु हुने गरी यस्ता कार्यहरु बन्द गर्ने निर्णय गरेको छ ।
खासगरी शुभ विवाह, मृत्यु पश्चात् गरिने काजकिरिया, मेला जात्रा तथा अन्य किसिमका पार्टी एवं भोजहरुमा मदिरा सेवन अत्यधिक हुने र त्यसले सामाजिक विकृति सङ्गै दूर्घटना समेत निम्त्याउन सक्ने सम्भावनालाई मध्यनजर गर्दै २०७९ फागुन १ गतेदेखि बन्द गर्ने निर्णय गरिएको हो ।
नियम उल्लंघन गरेमा पहिलोपटकलाई नगद रु. ३ हजार, दोस्रोपटकलाई नगद रु. ५ हजार र तेस्रोपटक समेत अटेरी गरि खुल्ला प्रकृतिले सेवन, लेनदेन र बिक्री वितरण गरेमा नगद रु. १० हजार जरिवाना संगै प्रशासनको जिम्मा लगाइने भएको छ ।
खासगरी विवाह तथा काजकिरियामा इष्टमित्र तथा आफन्तजनहरुले ऐचोपैचोका रुपमा जाड रक्सीको प्रयोग, विवाहमा कोसेलीका रुपमा समेत रक्सीको लेनदेन हुने गर्दछ ।
देउराली युवा क्लब नौबहिनी गाउँपालिका वडा नं. ५, डामृ र सानोडामृ टोल विकास संस्थाको आयोजना, नौबहिनी गाउँपालिका वडा नं. ५ का वडा अध्यक्ष दलराज पुन मगरको विशेष आतिथ्यता र सम्पुर्ण स्थानीयको उपस्थिति रहेको थियो ।