जनखोजी
प्युठान, माण्डवी गाउँपालिकाले गाउँपालिकामा प्राकृतिक प्रकोप तथा विपद् व्यवस्थापन तयारीका लागि छलफल शुरु गरेको छ । विपद् व्यवस्थापन तथा आर्थिक पुनर्लाभ योजना तयारी कार्यशाला गोष्ठी आयोजना शनिबार सम्पन्न भएको हो ।
माण्डवी गाउँपालिकाको आयोजनामा भएको कार्यक्रममा कोभिड १९ बाट प्रभावित संकटासन्न व्यक्तिहरुको आर्थिक उत्थानशिलता कार्यक्रम परियोजना अन्तरगत फुलबारी एकीकृत ग्रामीण विकास संस्था नेपालको सहकार्य रहेको छ । माण्डवी गाउँपालिकाका अध्यक्ष नमराज अधिकारी रोसनको अध्यक्षतामा भएको कार्यक्रममा गाउँपालिकामा विपद् व्यवस्थापनका लागि स्थानीय विपद् व्यवस्थापन योजना तर्जुमा गरी कार्यान्वयन गरिने अधिकारीले बताए ।
विपद् जोखिम न्युनिकरण तथा व्यवस्थापन ऐन २०७४ र स्थानीय सरकार सञ्चालन ऐन २०७४ को व्यवस्था अनुसार माण्डवीले सो कार्य थालनी गरेको हो । स्रोत व्यक्तिका रुपमा रहेको लक्ष्य टेर्निगं एण्ड रिसर्च सेन्टरका डा. मोहन बहादुर चन्द र बिबेक क्षेडालले विपद् जोखिम न्युनिकरण तथा व्यवस्थापन योजनाको सहजीकरण गरेका थिए ।
कार्यशालाबाट विषय क्षेत्रगत समुह समेत निर्माण गरेको छ । जस्ले क्षेत्रगत योजना निर्माणका लागि छलफल, सुझाव तथा योजना निर्माण गर्ने आयोजकले जनाएको छ ।
कार्यक्रममा माण्डवी गाउँपालिकाका कार्यपालिका सदस्य, कर्मचारी, फुलबारी एकीकृत ग्रामीण विकास केन्द्र र आड्रा नेपालका प्रतिनिधि लगायतको उपस्थिति रहेको थियो ।