प्युठान, जेठ ७(जनखोजी)ः माण्डवी गाउँपालिकाको आ.व. २०७९÷०८० को दोश्रो चौमासिक सार्वजनिक सुनुवाई कार्यक्रम सम्पन्न भएको छ । गाउँपालिकाको दोश्रो चौमासिक अवधिमा भएका विकास निर्माण र प्रवाह भएको सेवाको विषयमा सार्वजनिक सुनुवाई गरिएको हो ।
माण्डवी गाउँपालिकाको आयोजना र स्वर्गद्धारी विकास केन्द्र नेपाल, प्युठानको समन्वयमा भएको कार्यक्रममा गाउँपालिकाले प्रवाह गरेको सेवा, सेवा प्रवाहका क्रममा भएका समस्या र समाधानका विषयमा सवाल जवाफ भएको थियो ।
कार्यक्रममा गाउँपालिकाका अध्यक्ष नमराज अधिकारी (रोसन)ले गाउँपालिकाको आर्थिक, सामाजिक र राजनितिक क्षेत्रको विकासमा सबै पक्षलेको रचनात्मक सुझावको अपेक्षा रहेको बताए ।
कार्यक्रममा गाउँपालिका उपाध्यक्ष पुर्ण प्रसाद कालाथोकीले विकास आयोजनाहरुको प्रभावकारी ढंगले अनुगमनको काम भइरहेको बताउदै जनताको सेवा, विकास निर्माणमा सधैं तत्पर भए अगाडि बढ्ने बताए ।
कार्यक्रममा प्रमुख प्रशासकीय अधिकृत प्रकाश पाण्डेले गाउँपालिकाका सबै शाखाबाट हुने कामलाई अझै प्रभावकारी बनाउन लागि पर्ने प्रतिवद्धता व्यक्त गरे ।
सार्वजनिक सुनुवाईका क्रममा शिक्षा, स्वास्थ्य, खानेपानी, सरसफाई, भौतिक पूर्वाधार निर्माण लगायतका विषयमा राखेका जिज्ञाषाहरु गाउँपालिका अध्यक्ष नमराज अधिकारी, उपाध्यक्ष पूर्ण प्रसाद कालाथोकी र प्रमुख प्रशासकीय अधिकृत प्रकाश पाण्डे लगायत विषयगत शाखा र सम्बन्धित विषयगत शाखाका प्रमुखहरुले जवाफदेहीको वक्ताको रुपमा रहेका थिए ।
सुनुवाई कार्यक्रम माण्डवी गाउँपालिकाको आयोजना, स्वर्गद्धारी विकास केन्द्र, नेपालको समन्वयमा भएको कार्यक्रममा फुलबारी एकीकृत ग्रामीण विकास संस्थाको समेत सहयोग रहेको थियो ।
माण्डवी गाउँपालिका अध्यक्ष नमराज अधिकारीको अध्यक्षतामा भएको कार्यक्रममा उपाध्यक्ष पूर्ण प्रसाद कालाथोकी ,प्रमुख प्रशासकीय अधिकृत प्रकाश पाण्डे, राजनीतिक दलका प्रमुख तथा प्रतिनिधिहरु वडाध्यक्षहरु, कार्यपालिका सदस्यहरु, वडा सदस्यहरू, गाउँपालिकाका विषयगत शाखाका कर्मचारीहरु,पत्रकार, नागरिक समाज, बुद्धिजीवी, साझेदारी संस्थाका प्रमुख तथा प्रतिनिधि, र सरोकारवालाहरुको उपस्थिति रहेको थियो ।