तुल बहादुर कवँर मगर
देउखुरी २९ जेठ(जनखोजी) दाङको राप्ती गाउँपालिकाले बाख्रापालक कृषकहरुलाई बोयर बोका वितरण गरिएको छ ।

गाउँपालिकाले चालु आर्थिक वर्ष २०७९÷०८० को वार्षिक कार्यक्रम अनुसार ५० प्रतिशत लागत साझेदारीमा बोयर बोका वितरण गरेको हो । गाउँपालिकाले १८ जना बाख्रा पालक कृषकहरुलाई प्रजनन नश्ल सुधारका लागि ७५ प्रतिशत क्रस बोयर बोका वितरण गरिएको गाउँपालिकाका पशु सेवा शाखाका प्रमुख जीवराज पौडेलले जानकारी दिए । अनुदानमा बोका वितरणका लागि गाउँपालिकाले गत महिनामै आवेदन माग गरेको थियो । पौडेलका अनुसार प्राप्त आवेदनको आधारमा कृषकहरुलाई बोका वितरण गरिएको हो ।
सुर्खेतबाट खरिद गरी ल्याइएका बोयर जातका क्रस बोका गाउँपालिकाका अध्यक्ष प्रकाश विष्ट र उपाध्यक्ष कमलापती चौधरीले सोमबार वितरण गरेका हुन् । गाउँपालिकामा रहेका स्थानीय जातका बाख्राहरुमा नश्नल सुधार गरि उन्नत नश्लका बाख्रा उत्पादन गर्न बोका वितरण गरिएको गाउँपालिकाले जनाएको छ ।
नश्ल सुधार गरी गाउँपालिकालाई मासुमा आत्मनिरर्भर गराउने र कृषकको आयस्तर बृद्धि गर्ने उदेश्यले बोयर जातका बोका वितरण गरिएको गाउँपालिकाका अध्यक्ष प्रकाश विष्टले बताए । ३२ हजार देखि ५५ हजार मुल्य सम्मका बोका किसानले ५० प्रतिशत अनुदानमा पाएका हुन् ।