बबिता रिजाल कार्तिक २४ , प्युठान । अहिले प्रायः ठाउँमा देउसी भैलोको नाममा स्पिकर लगायतका साधनहरुमा बजारमा आएका गितहरु मात्र बजाएर मनोरञ्जन गर्ने प्रचलन बढ्दै गएको छ । जसले गर्दा हाम्रा परम्परागत मौलिक देउसी भैलोहरु ओझेलमा पर्न थालेका छन् भने पुराना संस्कृति नयाँ पुस्तामा हस्तान्तरण हुन सकेका छैनन् ।
यहि कुरालाइ मध्यनजर गर्दै स्वर्गद्धारी नगरपालिका वडा नम्बर ५ सारीे संस्कृतिको जगेर्नामा लागेको छ । हिन्दु नेपालीहरुको दाश्रो महान पर्व तिहार भित्रीँदै गर्दा सारीले आफ्नो वडामा मौलिक देउसी भैलोलाई जागाउन प्रोत्साहन थालेको छ । यस बर्ष तिहारमा खेलिने देउसी भैलोमा स्थानिय कला, संस्कृति र मौलिकता झल्काई उत्कृष्ट हुने २ समुहलाई वडाले सम्मान गर्ने भएको छ । शुक्रवार बसेको वडा समितीले पुराना मौलिक कला, संस्कृति सहितका देउसी भैलो कार्यक्रमहरु लोप हुँदै जादा देउसी भैलोको मर्म नै मेटिन सक्ने भएको भन्दै सो निर्णय गरेको हो ।
देउसी भैलो मनोरञ्जन संगै पुराना संस्कृतिको संरक्षण र सामाजिक कार्यमा सहयोग जुटाउने माध्यम हो । तर पछिल्लो समय पुराना मौलिक कला संस्कृति हराउँदै जादा देउसी भैलोको मर्म नै मेटिन सक्ने खतरा भएको भन्दै वडाले पुराना लोक संस्कृति जगाउन यस्तो निर्णय गरेको वडाध्यक्ष गिर बहादुर घर्ति मगरले बताउनुभयो । उहाँले भन्नुभयो “ पछिल्लो समयमा संस्कृति समेत पर निर्भरता भैरहेको पछिल्लो पुस्तालाई पुरानो संस्कृतिको बारेमा सामान्य ज्ञान समेत नभइराखेको अबस्थामा यसले पछिल्लो पुस्तालाई हाम्रो कला संस्कृति बारेमा ज्ञान प्राप्त गर्ने अबस्था सृजना गर्नेछ । ”
वडाको यो निर्णयले नागरीक उत्साहित हुने र नयाँ पुस्तामा पनि पुराना पुस्ताको कला, संस्कृति प्रति आकर्षण बढि यसलाई जोगाउन मद्दत मिल्ने अध्यक्ष घर्तिको विश्वास छ ।
