बबिता रिजाल, कार्तिक २६ , प्युठान । स्वर्गद्वारी नगरपालिकाका नगर प्रमुख टेक प्रसाद भण्डारी भुकम्पबाट क्षती भएका घरहरूको निरन्तर अनुगमनमा जुट्नुभएको छ ।
क्षति भएका ठाउँहरुमा वडा अध्यक्षहरूबाट सङ्कलन गरि प्रस्तुत गरिएका विवरण अनुसार नगरप्रमुख भण्डारी आफै सम्बन्धित स्थानमा गएर अवलोकन गरीरहनु भएको छ ।
क्षति भएका घरहरूको अवस्था र विवरण हेरि राहत प्रदान गर्ने नगरप्रमुख भण्डारीले बताउनु भयो । “ हामी निरन्तर अनुगमनमा छौँ ।” उहाँले भन्नुभयो “ कुन प्रकारको क्षति भएको छ , क्षतिको विवरण संकलन गरी सोहि अनुसार राहत प्रदान गछौँ ।”
भुकम्पबाट स्वर्गद्वारी नगरपालिकामा करिब सय घरमा सामान्य क्षती पुगेको छ भने केही घरहरू पूर्णरूपमा भत्किएका छन् । त्यसमध्ये वडा नम्बर ३ , ४ र ५ मा बढि क्षति भएको छ । प्रत्यक्ष अवलोकन तथा अध्ययन गरेर क्षतिको सम्पुर्ण विवरण सङ्कलन गरी विपत व्यवस्थापन कोष तथा अन्य स्रोतबाट व्यवस्थापन गरेर राहत दिने तयारी भएको उहाँले बताउनुभयो ।
अघिल्लो शुक्रवार मध्य राति ११.४७ बजे जाजरकोट केन्द्रविन्दु भएर गएको ६ दशमलव ४ रेक्टर स्केलको भुकम्पका कारण प्युठानमा पनि क्षति पुगेको हो । भुकम्पबाट प्युठानमा ३ जना घाइते भएका थिए । प्युठानको स्वर्गद्वारी नगरपालिका , झिमरुक गाउँपालिका , माण्डवी गाउँपालिका , गौैमुखी गाउँपालिकामा घरहरु पर्ण तथा आंशिक रुपमा भत्किएका छन् ।
अहिलेसम्म भुकम्पबाट जाजरकोट र रुकुमपश्चिम सहित विभिन्न १३ वटा जिल्लाका ६२ हजार भन्दा बढि घरमा क्षति पुगेको छ । भूकम्पका कारण जाजरकोटमा एक सय एक जना र रुकुम पश्चिममा ५३ जना गरी एक सय ५४ जनाको ज्यान गएको र तीन सय ६३ जना घाइते भएको गृह मन्त्रालयले जनाएको छ ।
