बबिता रिजाल, मंसीर ९ । प्युठान हरेक वर्ष नोभेम्बर २५ देखि डिसेम्बर १० (मंसिर ९ देखी २४)सम्म विश्वभर मनाइने लैङ्गिक हिंसा विरुद्धको १६ दिने अभियान आजदेखि सुरु भएको छ । ‘लैङ्गिक हिंसा मानव अधिकारको हनन हो’ भन्ने विषयमा राष्ट्रिय तथा अन्तर्राष्ट्रिय रूपमा जनचेतना विस्तार गर्न नेपालले पनि हरेक वर्ष नोभेम्बर २५ तारिखमा महिला हिंसा विरुद्धको राष्ट्रिय अभियान दिवसका रूपमा मनाउने गरेको छ ।
जस अन्तर्गत प्युठानको स्वर्गद्वारी नगरपालिकामा पनि आज लैङ्गिक हिंसा विरुद्ध १६ दिने अभियानको उद्घाटन गरिएको छ ।“लैङ्गिक हिंसा अन्त्यको सुनिश्चितताः बालबालिकामा लगानीको ऐक्यबद्धता” भन्ने राष्ट्रिय नारा सँगै शनिवार स्वर्गद्वारी नगरपालिकामा उद्घाटन सँगै दिप प्रज्वलन गरिएको छ ।
नगर स्तरीय महिला सञ्जालको आयोजना , स्वर्गद्वारी नगरपालिका महिला बालबालिका अपाङ्गता तथा जेष्ठ नागरिक शाखाको आर्थिक सहयोग र फुलबारी एकिकृत ग्रामिण विकास संस्था नेपाल कृषि तथा जिविकोपार्जन प्रवद्र्धन गोल–२ परियोजनाको सहकार्यमा स्वर्गद्वारी नगरपालिकामा एक कार्यक्रमका विच अभियानको सुरुवात गरिएको हो । यो सँगै नगरपालिका अन्तर्गतका सबै वडामा अभिमुखीकरण कार्यक्रम सञ्चालन गरी डिसेम्बर १० अर्थात मंसीर २४ गते जनचेतनामुलक सडक नाटक गरी अभियानको समापन गरिनेछ ।
महिलामाथि हुने हिंसाविरुद्ध व्यापक जनचेतना जगाउने र समस्याको पहिचान गरी समाधानका लागि राज्यलाई कानुनी आधार तय गर्न सहकार्य गर्नु, लैङ्गिक हिंसा विरुद्ध पुरुषको सहकार्यलाई अभिवृद्धि गर्नु, लैङ्गिक समानता तथा सामाजिक न्यायका क्षेत्रमा काम गर्ने अधिकारकर्मीबिच ऐक्यबद्धता गर्नु, लैङ्गिक हिंसाका विविध आयाममा रणनीतिक छलफल गर्नु १६ दिने अभियानका मुख्य उद्देश्य रहेका छन् ।
नगर स्तरिय महिला सञ्जालकी अध्यक्ष निशा घर्ति बजैलीको अध्यक्षतमा सञ्चालन भएको शनिबारको कार्यक्रममा जिल्ला समन्वय समिती प्युठानकी उपप्रमुख दुर्गा रेग्मी प्रमुख अतिथी हुनुहुन्थ्यो भने स्वर्गद्वारी नगरपालिकाका नगर प्रमुख टेक प्रसाद भण्डारी , नगर उप प्रमुख मिनराज राना मगर , प्रमुख प्रशासकिय अधिकृत मोहन पौडेल , नेपाली काङ्ग्रेस स्वर्गद्धारी नगर कमिटीका अध्यक्ष टिका भण्डारी , नगर स्तरीय महिला सञ्जाल तथा बाल सञ्जालका प्रमुख तथा प्रतिनिधि , विभिन्न सरकारी तथा गैर सरकारी संघ संस्थाका प्रमुख तथा प्रतिनीधि , वडा अध्यक्षहरु कार्यपालिका सदस्यहरु , नगरपालिकाका कर्मचारीहरु लगायतको उपस्थिती रहेको थियो ।
सन् १९८० को दशकदेखि नै विभिन्न नेपालले महिलामाथि हुने हिंसा विरुद्धको दिवस मनाउँदै आएको भए पनि सन् १९९९ मा संयुक्त राष्ट्रसङ्घले अनुमोदन गरेपछि महिलामाथि हुने हिंसा विरुद्धको विभिन्न अभियान सुरु भएको पाइन्छ । नेपालमा यो दिवस सन् १९९७ देखि विभिन्न कार्यक्रमको आयोजना गरी मनाउन थालिएता पनि वि.सं.२०७५ कात्तिक २९ गतेको मन्त्रिपरिषद्को बैठकले हरेक वर्ष नोभेम्बर २५ तारिखलाई महिला हिंसा विरुद्धको १६ दिने अभियान दिवसका रूपमा मनाउने घोषणा गरेको थियो । यसैलाई प्रभावकारी कार्यान्वयन गर्ने उद्देश्यले सबै समुदायदेखि तहसम्म विभिन्न गतिविधि र कार्यक्रम गरी यो दिवस मनाउँन थालिएको हो ।
