बबिता रिजाल , मंसिर १७ प्युठान । अपाङ्गता भएका व्यक्तिको ३२ औं अन्तराष्ट्रिय दिवसको अवसरमा दिवस स्वर्गद्वारी नगरपालिकामा आईतवार एक कार्यक्रम गरी मनाईएको छ । “दिगो विकास लक्ष्य प्राप्तिको प्रतिवद्धताः अपाङ्गता भएका व्यक्तिको अपनत्व र नेतृत्वसहितको एैक्यवद्धता” भन्ने राष्ट्रिय नारा सहित आईतबार स्वर्गद्वारी नगरपालिका ३ जलुकेमा रहेको जेष्ठ नागरिक मिलन केन्द्र भवनमा कार्यक्रम गरिएको हो ।
स्वर्गद्वारी नगरपालिकाको नगर स्तरिय अपाङ्गता सञ्जालको आयोजना , स्वर्गद्वारी नगरपालिका महिला बालबालिका अपाङ्गता तथा जेष्ठ नागरीक शाखाको आर्थिक सहयोग र फुलबारी एकिकृत ग्रामिण विकास संस्था नेपाल , कृषि तथा जिविकोपार्जन प्रवद्र्धन परियोजना (गोल–२) को सहकार्यमा अपाङ्गता भएका व्यक्तिको ३२ औं अन्तराष्ट्रिय दिवस मनाईएको हो ।
कार्यक्रममा बोल्दै प्रमुख अतिथि स्वर्गद्वारी नगरपालिकाका नगर उपप्रमुख मिनराज राना मगरले अपाङ्गता भएका व्यक्तिहरुलाई सजिलैसँग अपाङ्गगता परिचय पत्र प्रदान गर्ने व्यवस्था गरिएको र हिडडुल गर्न नसक्ने व्यक्तिहरुलाई उनिहरुको घरदैलो मै पुगेर पनि अपाङ्गता परिचय पत्र प्रदान गर्ने गरेको बताउनुभयो । उहाँले अपाङ्गता भएका व्यक्तिहरूको मर्यादा, अधिकार र कल्याणका लागि नगरपालिकाले सकेसम्मको काम गरिरहेको पनि बताउनुभयो । उहाँले भन्नुभयो “आवश्यकता अनुसार नगरपालिकाले अपाङ्ग व्यक्तिहरूको व्यक्तित्व तथा सामाजिक विकासको लागि कार्यक्रम गर्न नसकेपनी अझै तदारुकताको साथमा लागिरहेका छौं । ”
यस्तै सामाजिक विकास समितिका संयोजक तथा स्वर्गद्वारी नगरपालिका वडा नम्बर ५ का वडा अध्यक्ष गिर बहादुर घर्तीले भन्दै हेलेन केलर तथा झमक कुमारीको उदाहरण दिदै अपाङ्गता भएका व्यक्तिले आफुलाई कमजो छु भन्ने नसम्झन आग्रह गर्नुभयो । “शारीरिक रूपमा केही दुर्वलता भएपनी तपाईंहरू मानसिक रूपमा बलियो हुनुहुन्छ । केही न केही प्रतिभा र क्षमता सबैसँग हुन्छ , त्यसैलाई आधार बनाएर अगाडि बढ्नु पर्छ ।” उहाँले भन्नुभयो “म कमजोरी छुँ भन्ने मानसिकतालाई मिल्काउदै अगाडि बढ्नु पर्छ । सापङ्गले सबै काम गर्छ नै भन्ने हुँदैन तर अपाङ्गले धेरै गर्न सक्छन । अपाङ्गको व्यक्तित्व विकासको लागि नगरपालिका सधै तयार छ । ”
आईतबारको कार्यक्रममा स्वर्गद्वारी नगरपालिका भित्रका अपाङ्ग भएका ९ जना गरिब तथा जेहेन्दार विद्यार्थीहरूलाई शैक्षिक सामाग्री तथा अपाङ्ग भएर पनि कृषि तथा पशुपालनका क्षेत्रमा प्रगती गर्दै आएका व्यक्तिहरुलाई कृषि सामाग्रीहरु वितरण गरिएको छ ।
सन् १९९२ देखी संसारभरि अन्तराष्ट्रिय अपाङ्गता दिवस मनाउन थालिएको हो । संयुक्त राष्ट्रसङ्घले सन् १९८१ लाई अपाङ्ग वर्ष घोषणा गरी विश्वव्यापी रूपमा मनाउन आह्वान गरेपछि बर्सेनि डिसेम्बर ३ मा संसारभर विश्व अपाङ्गता दिवस मनाउन सुरु गरिएको हो ।
स्वर्गद्वारी नगरपालिकाको नगर स्तरिय अपाङ्गता समितीका अध्यक्ष दधिराम शर्माको अध्यक्षतामा सञ्चालित कार्यक्रमको प्रमुख अतिथि स्वर्गद्वारी नगरपालिकाका नगर उपप्रमुख मिनराज राना र विशेष अतिथि प्रमुख प्रशासकीय अधिकृत मोहन पौडेल हुनुहुन्थ्यो भने ९ वटै वडाका वडा अध्यक्ष , महिला बालबालिका अपाङ्गता तथा जेष्ठ नागरीक शाखा प्रमुख निमा डाँगी , फुलबारी एकिकृत ग्रामिण विकास संस्था (आड्रा) नेपाल , कृषि तथा जिविकोपार्जन प्रवद्र्धन परियोजना (गोल–२) का स्वर्गद्वारी नगर संयोजक मोहन सुवेदी , आड्रा नेपालका कार्यक्रम अधिकृत पुर्ण श्रेष्ठ लगायतको उपस्थिती रहेको थियो ।
