शशिधर भण्डारी
प्युठान, २३ पुसः प्युठानको प्युठान बसपार्क टिकुरी देखि भारतको राजधानी नयाँ दिल्लीसम्म सोमबारदेखि नेपाल नेपाल–भारतमैत्री बस सेवा सुरु भएको छ । लुम्बिनी प्रदेश सरकारका उद्योग तथा यातायातमन्त्री सरोज थापाले सेवाको उद्घाटन गर्नु भएको हो ।
उद्घाटन कार्यक्रममा मन्त्री थापाले यातायात क्षेत्रको व्यवस्थापन र जनताको सहजताका लागि आफ्नो प्राथमिकता रहेको जानकारी दिनुभयो । मन्त्री थापाले भन्नुभयो, “नागरिकको गुनासो नआउने गरी यातायात सेवा सञ्चालनमा व्यवसायी र प्रा.लि.ले ध्यान देओस ।” थापाले आफ्नो कार्यकालमा प्युठानका यातायात कार्यालयको स्थापना गर्ने प्रतिवद्धता व्यक्त गर्नु भयो ।
प्युठानको स्वर्गद्वारी गौमुखी यातायात सेवा प्रा.ली.ले दैनिक रुपमा सेवा प्रबाह हुनेगरी एसी डिलक्स बस सेवा सुरु गरेको अध्यक्ष सुनिल बस्नेतले जानकारी दिनु भयो । दैनिक दिउसो १ वजे प्युठान बसपार्कबाट बस छुट्नेछ । ग्राहकको माग अनुसार आवश्यक परे बसहरु थप्दै जाने बस्नेतको भनाइ छ ।
प्युठान–नयाँ दिल्ली बस सेवा सञ्चालनले भारतमा नोकरीका लागि जाने यात्रुहरुलाई सहजता थपिएको भन्दै खुसी व्यक्त गरेका छन् । मल्लरानी गाउँपालिका १ चुँजाका सोभे नेपालीले प्युठानबाट सिधै नयाँ दिल्ली जान पाउँदा बाटोमा हुने झन्जट मुक्त बताउनु भयो । नेपालीले भन्नुभयो,“अल्लिलो पटक कृष्णनगर पुगेर गाडी नपाउँदा अर्को दिन मात्रै गएको थिए, यो पटक समय, झन्जट र गाडी नबदल्दा पैसाको बचत हुने भएकोले खुसी लागेको छ ।” बस सेवालाई निरन्तरता दिए पुग्ने उहाँको भनाइ छ ।
नौबहिनी गाउँपालिका–६ का पदम परियारले तेश्रो पटकमा भारत जाँदा बसमा जाउन पाउँदा सहजता थपिएको बताउनु भयो । पहिलो पटक नेपालगञ्ज र दोश्रो पटक कृष्णनगर हुँदै दिल्ली जानुभएको थियो ।