रिता आचार्य
प्युठान, दश दिन भित्र सडकका सामग्री नहटाए झिमरुक गाउँपालिकाले कारबाही गर्ने भएको छ । पालिकाका बजार क्षेत्रभित्रका सडकमा राखिएका सामग्री हटाउन १० दिनको समय दिएको हो । स्थानीयले सडकमा जथाभावी सरसामान थुपारेर आवागमन असहज हुन थालेपछि झिमरुक गाउँपालिकाले १० दिने सूचना जारी गरेर हटाउन आग्रह गरेको छ ।
प्युठान नगरपालिकाको सीमा देखि अर्घाखाँची र गुल्मिको सीमानासम्मै यो समस्या देखिएकोले झिमरुक गाउँपालिकाका अध्यक्ष पित बहादुर महतरा क्षेत्रीले जानकारी दिनुभयो । सडकमा अनधिकृत रुपमा निर्माण समाग्रीहरु ढुङ्गा, गिट्टी, बालुवा, छठ, सिमेन्ट, व्यावसायिक सामाग्रीहरु पसल देखि सडकसम्म राख्ने, सवारी मर्मत बाटो अवरोध गरेर गर्ने समस्या भएकोले गुनासो बढ्दै गएकोले सडक खाली गराउने अभियानको रुपमा सञ्चालन गर्न थालेको अध्यक्ष क्षेत्रीले बताउनुभयो । सूचनाको मितिमा सामाग्री नहटाए गाउँपालिकाले कानुन अनुसार कारबाही गर्ने अध्यक्ष क्षेत्रीको भनाइ छ ।
सार्वजनिक आवागमनलाई अवरोध नगर्न गाउँपालिकाका प्रमुख प्रशासकीय अधिकृत पवन कुमार शाहीले आग्रह गर्नुभएको छ । उहाँले भन्नुभयो,‘जथाभावी सरसामान राख्दा आवागमन गर्नेलाई सांस्ती भएको छ, त्यसैले हटाउन आग्रह गरिएको हो ।’
गाउँपालिकाले सार्वजनिक क्षेत्रमा बनाइएका संरचना, सडक क्षेत्र मिचेर बनाइएका संरचना हटाउन कार्यविधि निर्माणको पक्रिया शुरु भएको जनाएको छ । गाउँपालिकाका अध्यक्ष पित बहादुर महतरा क्षेत्रीले कार्यबिधि निर्माण पछि नाँपजाँच संरचना हटाउने अभियान थाल्ने योजना रहेको समेत जानकारी दिनुभयो ।
प्युठान नगरपालिकाले समेत सडक खाली गराउने कार्यक्रम सञ्चालन गरी बाग्दुलामा आवागमन सहजता बनाएको छ । प्युठानको मुख्य बजार क्षेत्र रहेको बाग्दुलाको आवागमनमा सहजताले सर्वसाधारणलाई सहज भएको छ । प्युठान नगरपालिका पछि झिमरुक गाउँपालिकामा सडक आवागमन सहज बनाए धुलाम्मे र जथाभावी सडक सामाग्रीको जोमिखमै यात्रा गर्न बाध्य यात्रुहरुलाई सहजता हुनेछ ।