शशिधर भण्डारी

प्युठान,३ चैत(जनखोजी)ः झिमरुक गाउँपालिकाले स्नातक तहसम्म निःशुल्क शिक्षाको व्यवस्था गरेपछि विद्यार्थीको आकर्षण बढेको छ । झिमरुक गाउँपालिका–५ मच्छिमा रहेको गौमुखी क्याम्पसमा पढ्ने विद्यार्थीलाई शिक्षा र भर्ना शुल्कमा छुट दिएपछि विद्यार्थीको सङ्ख्या बृद्धि भएको क्याम्पसले जनाएको छ ।
गत वर्ष क्याम्पसको पहिलो वर्षमा भर्ना भएका विद्यार्थीको सङख्या ५३ रहेकोमा यस वर्ष वृद्धि भइ १४५ जना पुगेको गौमुखी क्याम्पसका क्याम्पस प्रमुख शेर बहादुर जि.सी.ले जानकारी दिनुभयो । झिमरुक गाउँपालिकाको आर्थिक वर्ष २०८०÷०८१ को वार्षिक स्वीकृत कार्यक्रम अन्तरगत गौमुखी क्याम्पसमा अध्ययन गर्ने विद्यार्थीहरुलाई निःशुल्क शिक्षा प्रदान गर्ने निति तथा कार्यक्रम लिएको थियो । सो कार्यक्रमले क्याम्पसमा स्नातक अध्ययन गर्न विद्यार्थीहरुलाई आकर्षित गरेको क्याम्पस प्रमुख जि.सी.ले बताउनु भयो ।
क्याम्पस प्रमुख जि.सी.का अनुसार विद्यार्थीले प्रथम वर्षमा रु ३ हजार ५५०, दोश्रो र तेश्रो वर्षमा रु ३ हजार र चौथो वर्षमा रु २ हजार ५०० भर्ना शुल्क र मासिक रु ८ सयका दरले शिक्षा शुल्क बुझाउनु पर्दथ्यो । झिमरुक गाउँपालिकाको सहयोग पछि सो शुल्क पूर्ण रुपमा छुट गरिएको छ । क्याम्पसले भने फर्निचर र व्यवस्थापन भन्दै वार्षिक रु १ हजार रुपैया लिने गरेको छ । क्याम्पस प्रमुख जि.सीले भन्नुभयो,‘व्यवस्थापन र प्रयोगात्मक परिक्षा शुल्क विद्यार्थीले व्यहोर्नुपर्ने भएपनि भर्ना र शिक्षा शुल्क पूर्ण रुपमा छुट हुँदा विद्यार्थी राहत पुगेको छ ।’ २०६३ सालमा स्थापित गौमुखी क्याम्पसमा शिक्षा र व्यवस्थापन संकाय अन्तगतका विषयमा पढाइ हुन्छ ।
क्याम्पसभर जम्मा २ सय ७० जना विद्यार्थी रहेका छन् । निःशुल्क शिक्षाले महिलाहरुलाई उच्च शिक्षाको पहुँचमा ल्याउन थालेको छ । पहिलो वर्षमा भर्ना भएका एक सय ४५ जना विद्यार्थी मध्ये एक सय ३० जना छात्रा रहेको क्याम्पसको तथ्यांक छ । प्रथम वर्षको रजिष्टेशन शुरु नभएकोले विद्यार्थी सङ्ख्या अझै वृद्धि भइ १ सय ७० जनाको अनुमान गरिएको जि.सी.को भनाइछ ।
यस वर्षपछि वृद्धि हुन थालेपछि क्याम्पस सञ्चालनमा समेत सहयोग पुग्ने विश्वास गरिएको छ । आयश्रोत विहिन वस्तीमा निःशुल्क पठनपाठनले विद्यार्थीलाई सहज र पहुँच वृद्धि गरिदिएको झिमरुक गाउँपालिका–५ ओखरकोटका स्थानीय दल बहादुर जि.सी.ले बताउनु भयो ।
झिमरुक गाउँपालिकाले स्नातक तहमा निःशुल्क शिक्षाका लागि गत आर्थिक वर्षमा रु २५ लाख वजेट विनियोजन गरेको गाउँपालिकाका अध्यक्ष पित बहादुर महतरा क्षेत्रीले जानकारी दिनुभयो । क्याम्पसलाई वर्षेनी अनुदान दिँदै आइरहेको भएपनि यस वर्षबाट गाउँपालिकाले स्नातक सम्मको शिक्षा निःशुल्क गर्ने योजना अनुसार वजेट व्यवस्था गरेको उहाँले बताउनुभयो ।
गाउँपालिकाले आर्थिक वर्ष २०७९।०८० मा रु २५ लाख र आर्थिक वर्ष २०८०।०८१ रु २५ लाख उपलब्ध गराइसकेको छ । विद्यार्थी सङ्ख्या अनुसार थप व्यवस्था मिलाउने गाउँपालिकाको योजना रहेको छ । गौमुखी क्याम्पसमा अध्ययन गर्ने जुनसुकै पालिकाका विद्यार्थीको हकमा निःशुल्क हुने अध्यक्ष महतराको भनाइछ ।
झिमरुक गाउँपालिकाले यस वर्ष देखि माध्यामिक तहसम्म निःशुल्क शिक्षा अन्तरगत दरवन्दी मिलान गर्ने भएको छ । अध्यक्ष महतराका अनुसार यस वर्ष पालिकाका सबै विद्यालयमा दरवन्दी मिलान गर्ने झिमरुक गाउँपालिकाको निती रहेको छ ।