बबिता रिजाल, फागुन ४ प्युठान ।   जाल्पा सामुदायिक लघुवित्त वित्तिय संस्था लिमिटेडको शाखा कार्यालय भिंगृले स्व. भिमा कुमारी श्रेष्ठलाई करिब साढे ६ लाख विमा रकम हस्तान्तरण गरेको छ । आईतबार स्वर्गद्धारी नगरपालिका ४ भिंगृमा एक कार्यक्रमका विच उक्त विमा बापतको रकम हस्तान्तरण गरेको हो । २०८० साल साउन १० गते भिमा कुमारी श्रेष्ठले जाल्पा सामुदायिक लघुवित्त वित्तिय संस्था लिमिटेड बाट रु. ५ लाख रकम कर्जा लिनुभएको र उहाँको २०८० साल कार्तिक ५ गते आकस्कि मृत्यु भए पश्चात संस्थाको नियम अनुसार कर्जा रकम रु. ५ लाख , काजक्रिया सुविधा रु. १ लाख ४० हजार र विमा प्रिमीयम रु. ३ हजार ४ सय ७८ रुपैयाँ १३ पैसा गरि जम्मा ६ लाख ४३ हजार ४ सय ७८ रुपैयाँ १३ पैसा विमा रकम उहाँको छोरा मिलन श्रेष्ठलाई उपलब्ध गराईएको जाल्पा सामुदायिक लघुवित्त वित्तिय संस्था लिमिटेडको शाखा कार्यालय भिंगृका उद्यम विकास संयोजक घनश्याम भुषालले जानकारी दिनु भयो ।

कार्यक्रममा बोल्दै प्रमुख अतिथि स्वर्गद्धारी नगरपालिकाका नगर प्रमुख टेक प्रसाद भण्डारीले जाल्पा सामुदायिक लघुवित्त वित्तिय संस्था लिमिटेडले गरेको विमा सुविधा वितरण कार्यक्रमलाई धन्यावाद दिदै आगामी दिनहरुमा नगरपालिका पनि सहकार्य गरेर अगाडी बढ्ने बताउनु भयो । यस्तै नगर प्रमुख भण्डारीले स्व. भिमा कुमारी श्रेष्ठ प्रति श्रद्धाञ्जली अर्पण गर्दै उहाँका परिवार प्रति समवेदना प्रकट गर्नुभयो । उक्त विमा रकमले पिडित परिवारलाई धेरै राहत मिल्ने हुदा जाल्पा सामुदायिक लघुवित्त वित्तिय संस्था लिमिटेडको विमा सुविधा कार्यक्रम प्रशंसा योग्य रहेको उहाँको भनाई छ ।
जाल्पा सामुदायिक लघुवित्त वित्तिय संस्था लिमिटेडकी केन्द्र सदस्य सुमी गुरुङको अध्यक्षतामा सम्पन्न भएको आईतबारको विमा सुविधा वितरण कार्यक्रममा प्रमुख अतिथि स्वर्गद्धारी नगरपालिकाका नगर प्रमुख टेक प्रसाद भण्डारी , जाल्पा सामुदायिक लघुवित्त वित्तिय संस्था लिमिटेडको शाखा कार्यालय भिंगका शाखा प्रबन्धक अनिल के.सी. लगायतको उपस्थिती रहेको थियो भने कार्यक्रमको सञ्चालन जाल्पा सामुदायिक लघुवित्त वित्तिय संस्था लिमिटेडको शाखा कार्यालय भिंगृका उद्यम विकास संयोजक घनश्याम भुषालले गर्नुभएको थियो ।