केशर सुनार,प्युठान ।चैत १५ गतेबाट सुरु हुने यस वर्षको माध्यमिक शिक्षा परीक्षा (एसईई)मा प्युठान जिल्लाबाट तीन हजार नौ सय छहत्तर जना विद्यार्थी सामेल हुने भएका छन् । जिल्लाका ९ वटा पालिकाका १४ सामुदायिक र २ संस्थागत गरी १६ परीक्षा केन्द्रबाट तीन  हजार ९४५ नियमित र ३१ ग्रेड वृद्धि गरी जम्मा तीन हजार ९७६ जना विद्यार्थीले एसईई दिन लागेको शिक्षा विकास तथा समन्वय इकाई प्युठानका प्रमुख दुर्ग बहादुर खड्काले जानकारी दिनुभयो ।
इकाई प्रमुख खड्काका अनुसार एक खुला विद्यालय ७२ सामुदायिक विद्यालय र ७ संस्थागत गरी ८० विद्यालयका दुई हजार १३९ छात्रा र एक हजार ८३७ छात्र गरी तीन हजार ९७६ विद्यार्थीले एसईई दिने भएका हुन् । उहाँका अनुसार आठ वटा सामुदायिक विद्यालयका दुइ सय ५ जना प्राविधिकधारका विद्यार्थीहरु पनि एसईईमा सामेल हुनेछन् ।
सबैभन्दा बढी प्युठान नगरपालिकामा चार ,झिमरुक गाउपालिकामा तीन,स्वर्गद्वारी नगरपालिका र मल्लरानी गाउपालिका दुई-दुई,गौमुखी,नौबहिनी,ऐरावती,सरुमारानी र माण्डवी गाउपालिकामा एक-एक गरी जम्मा १६ परीक्षा केन्द्र तोकिएको इकाई प्रमुख खड्काले जानकारी दिनुभयो ।
नौबहिनीको गंगा माध्यमिक विद्यालय बाहाने केन्द्रबाट सबैभन्दा बढी ४२८ विद्यार्थीले एसईई दिन लागेका छन् ।त्यसैगरी झिमरुकको लक्ष्मी माध्यमिक विद्यालय बांगेमरोठ केन्द्रबाट सबैभन्दा कम ७४ जना विद्यार्थी एसइईमा सहभागी हुन लागेको खड्काले बताउनुभयो ।
गत वर्ष प्युठान जिल्लाबाट चार हजार ९२ जना विद्यार्थीले एसईई दिएका थिए । यस वर्ष गत वर्षको तुलनामा ११६ कम विद्यार्थी एसईईमा सहभागी हुदैछन्।