बबिता रिजाल , जेठ ६ प्युठान । स्वर्गद्वारी नगरपालिकामा प्रारम्भिक बालविकासका शिक्षकहरको लागि ३ दिने क्षमता बिकास तालिम सम्पन्न भएको छ । स्वर्गद्वारी नगरपालिकाको आयोजनामा , जेसुईत सामाजिक संस्थाको प्राविधिक सहयोग तथा जिल्ला प्रहरी कार्यलय प्यूठानको समन्वयमा तालिम सञ्चालन गरिएको स्वर्गद्वारी नगरपालिका सामाजिक विकास समिति संयोजक तथा वडा नं ५ का वडा अध्यक्ष गिरबहादुर घर्ति मगरले जानकारी दिनुभयो ।
जेठ ४ गते देखी सुरु भएको प्रारम्भिक बालविकासका शिक्षकहरको लागि क्षमता बिकास तालिमको आज अन्तिम दिन सहभागी शिक्षकहरुलाई प्रमाणपत्र वितरण गरिएको पनि मगरले बताउनुभयो । शिक्षकहरुलाई समय समयमा तालिम दिदा शिक्षाको जग बलियो हुने र शैक्षिक गुणस्तर वृद्धिमा मद्दत पुग्ने अध्यक्ष गिरबहादुर घर्ति बताउनुहुन्छ ।
स्वर्गद्वारी नगरपालिकाका नगर प्रमुख टेक प्रसाद भण्डारीको अध्यक्षतामा सुरु भएको क्षमता विकास तालिमको समापन समारोह कार्यक्रममा स्वर्गद्वारी नगरपालिकाका नगर उप–प्रमुख मिनराज राना, जिल्ला प्रहरी कार्यलयका प्रमुख प्रहरी नायव उपरीक्षक इश्वर थापा, सामाजिक विकास समिति संयोजक तथा वडा नं ५ को अध्यक्ष गिर बहादुर घर्ती मगर, अन्य वडाका वडा अध्यक्षहरु , कार्यपालिका सदस्यहरु लगाएतको उपस्थिति रहेको थियो । कार्यक्रममा स्वागत मन्तव्य सामाजिक विकास समिति संयोजक तथा वडा नं ५ को अध्यक्ष गिर बहादुर घर्ती मगर ले राख्नुभएको थियो भने कार्यक्रम सञ्चालन ओविराम भण्डारीले गर्नुभएको थियो ।
