केशर सुनार
प्युठान,१० जेठ।प्युठानको नौबहिनी गाउँपालिका वडा नं-४ खबाङ्गमा नेतृत्व विकास बाचनकला र लेखनसिप सम्बन्धि दुई दिने महिला सशक्तीकरण तालिम सम्पन्न भएको छ।सोही वडाका वडाध्यक्ष भिम बहादुर घर्ती मगरको अध्यक्षतामा शुरु भएको तालिममा गाउँपालिका अध्यक्ष डिल बहादुर थापाको प्रमुख आतिथ्यता,गाउँपालिका उपाध्यक्ष विष्णा थापा र प्रमुख प्रशासकीय अधिकृत शिवराज पौडेलको विशेष आतिथ्यता रहेको थियो।
कार्यक्रममा बोल्दै प्रमुख अतिथि तथा गाउँपालिका अध्यक्ष डिलबहादुर थापाले महिलाहरुको हरेक क्षेत्रमा संख्यात्मक सहभागी मात्र नभई अर्थपूर्ण सहभागी हुनुपर्ने बताए।यी यस्ता सशक्तीकरण तालिमले महिलाहरुलाई कला सीप सँगै हरेक क्षेत्रमा प्रतिनिधित्व गर्नमा सहयोग पुर्याउने बताए।
नौबहिनी गाउँपालिकाको आर्थिक सहयोगमा सञ्चालन गरिएको उक्त कार्यक्रमको आयोजना स्वर्गद्वारी डिजाईन एसोसिएट्स प्रा.लि स्वर्गद्वारी प्युठानको प्राविधिक सहयोग एवम् आयोजनामा गरिएको हो।
तालिममा मधुसुदन भण्डारी,पारस भण्डारी र प्रदिप भण्डारीले प्रशिक्षण गरेका थिए।उक्त कार्यक्रममा ४५ जना बढी महिलाहरु तालिममा सहभागी भई लाभान्वित बनेको एसोसिएट्सका सञ्चालक सुशिला घर्ती मगरले बताईन।उक्त तालिममा नेतृत्वकला सम्बन्धि,बोल्ने शैली,माईन्युट लेखनसीप जस्ता महिला सशक्तीकरण तालिम दिईएको थियो।
तालिममा सहभागी सबैलाई प्रमाणपत्र वितरण गरिएको हो।बुधबारदेखि शुरु भएको उक्त दुई दिने कार्यक्रम बिहीवार नौबहिनी गाउँपालिका वडा नं-४ खबाङ्गको कार्यालयमा सम्पन्न भएको हो।
