प्युठान, १३ जेठ(जनखोजी)ः प्युठानको माण्डवी गाउँपालिकाको सार्वजनिक सुनुवाई तथा आ.व. २०८१÷०८२ को नीति कार्यक्रम तथा बजेट निर्माणको विषयमा छलफल कार्यक्रम आइतबार देविस्थानमा सम्पन्न भएको छ । माण्डवी गाउँपालिकाका अध्यक्ष नमराज अधिकारी(रोसन)को अध्यक्षतामा भएको कार्यक्रममा बोल्ने वक्ताहरूले गाउँपालिकाले प्रवाह गर्ने सेवालाई प्रभावकारी बनाउन र जनमैत्री नीति तथा कार्यक्रम निर्माण गर्न सुझाव दिएका छन् ।
कार्यक्रममा सहभागी सेवाग्राहीहरु नरेश्वर लम्साल, श्रीकुमार शर्मा, राजेन्द्र राउत क्षेत्री, रामचन्द्र पौडेल, चन्द्रमणी आचार्य, टोपाराम आचार्य, ललितजंग मल्ल, रेशम बहादुर ठेडी, शान्त बहादुर कार्की, डम्बर बहादुर पौडेल र चिन्त बहादुर के.सी.ले विकास निर्माणमा भएका गुनासा, आ.व. २०८१÷०८२ नीति कार्यक्रम तथा बजेट निर्माणका लागि सुझाव, खानेपानी तथा सडक पूर्वाधार निर्माणका सवालहरुमा विषयबस्तु उठान गरेका थिए ।
सार्बजनिक सुनुवाई कार्यक्रममा उठेका जिज्ञाशा तथा सवालहरुको जवाफ दिदै माण्डवी गाउँपालिका अध्यक्ष नमराज अधिकारी रोसनले गाउँपालिकाको सेवा प्रवाह र कार्य चुस्ततालाई थप प्रभावकारी बनाउन आफु निरन्तर लागेको बताउनु भयो । अध्यक्ष अधिकारीले सुनुवाईमा उठेका विषयवस्तुलाई सकारात्मक ढंगले ल्याउदै आगामी दिनहरुमा पालिकावासीको उन्नती, प्रगति र समृद्धिका लागी आउने सबै सकारात्मक सुझावमा हातेमालो गर्ने आफुहरु तयार रहेको समेत बताउनु भयो ।
त्यसैगरी उपाध्यक्ष पूर्ण प्रसाद कालाथोकीले गाउँपालिकालाई समृद्ध बनाउनका लागि गाउँपालिकामा निरन्तर सल्लाह सुझाव दिन अनुरोध गर्नु भयो ।
त्यसैगरी प्रमुख प्रशासकीय अधिकृत प्रकाश पाण्डेले गाउँपालिकाले गुणस्तरीय सेवा प्रबाहलाई प्रमुख प्राथमिकता दिएको बताउनु भयो । सर्वसाधारणबाट आएका सवालहरुको जवाफ दिदैं उहाँले गुनासो रहित गाउँपालिकाको सेवा प्रबाहका लागि निरन्तर लागि रहेको बताउनु भयो ।
कार्यक्रममा २ नं वडा अध्यक्ष प्रकाश वली, ३ नं. वडा अध्यक्ष धनेन्द्र कार्की, ४ नं. वडा अध्यक्ष डिल बहादुर घर्तिं, ५ नं. वडा अध्यक्ष दुर्गाप्रसाद आचार्य, कार्यपालिका सदस्यहरु, गाउँसभासदस्यहरु, कर्मचारी विभिन्न संघसंस्थाका प्रतिनिधिहरु, राजनैतिकदल, समाजसेवी र सरोकारवालहरुको उपस्थिति रहेको थियो । माण्डवी गाउँपालिकाको आयोजनामा भएको कार्यक्रमको सहजीकरण झुलेनि मिडिया प्रा.लि.ले गरेको थियो ।