केशर सुनार,प्यूठान।लुम्बिनीका निवर्तमान मुख्यमन्त्री डिल्ली चौधरीले अनलाईन टिकट सिस्टमले यात्रुहरुको यात्रामा सहजता थप्ने बताएका छन् ।
शुक्रबार प्यूठानको प्यूठान नगरपालिका-४ जुम्रीमा स्वर्गद्वारी गौमुखी यातायात सेवा प्रा.लिको आयोजनामा भएको अनलाईन टिकट सिस्टम कार्यक्रमको उद्घाटन गर्दै मुख्यमन्त्री चौधरीले भने, ‘लुम्बिनीमा सरोज थापा यातायातमन्त्री हुँदा यातायातको क्षेत्रमा धेरै सुधार आएको छ।’
चौधरीले भने, ‘स्वर्गद्वारी गौमुखी यातायात प्रा.लिले ल्याएको यो अनलाईन सिस्टमले यातायात सुविधामा नागरिकहरुको सरल, सहज र समान पहुँच सुनिश्चित गर्दै यातायात क्षेत्रमा लगानी अभिवृद्धि गर्ने र यातायात क्षेत्र सुरक्षित, व्यवस्थित र अपाङ्गता भएका व्यक्ति अनुकुल बनाउने नीति अनुसार सरकार अघि बढ्न आवश्यक छ।
साथै सोहि सिस्टमलाई दिगो बनाउनका लागि प्रत्येक वडाका वडाध्यक्ष सिकाई प्रवर्द्धन एवम् प्रचारप्रसार कार्यक्रम गर्नुपर्ने चौधरीले बताएका छन।
प्यूठानका प्रमुख जिल्ला अधिकारी नारायण प्रसाद अर्यालले यातायात सेवालाई थप प्रभावकारी बनाउन अपाङ्ग भएका व्यक्तिहरुलाई विशेष छुटका साथ टिकट व्यवस्था गर्नुपर्ने बताएका छन।
कार्यक्रममा लुम्बिनी प्रदेशका सांसद योगेन्द्र चौधरी,डिलबहादुर राना, सरोज थापा (रोज राणा),प्रमुख जिल्ला अधिकारी नारायण प्रसाद अर्याल,राजनीतिक दलका प्रमुखहरु,यातायात व्यावसायी एवम् सञ्चारकर्मीहरुको सहभागी रहेको थियो।
अबदेखी स्वर्गद्वारी गौमुखी यातायात सेवा प्रा.लिमा प्यूठान देखि काठमाडौं सम्म यात्राका लागि मोबाईल एप्समै अनलाईन टिकट बुकिङ गर्न सकिनेछ।
