बबिता रिजाल, असार १० प्युठान । स्वर्गद्धारी नगरपालिकाले आउँदो आर्थिक बर्ष २०८१÷८२ को नीति तथा कार्यक्रम र बजेट प्रस्तुत गरेको छ । सोमबार स्वर्गद्धारी नगरपालिका ३ जलुके धर्मशाला भएको १५ औँ नगरसभाको पहिलो बैठकमा स्वर्गद्धारी नगरपालिकाका नगर प्रमुख टेक प्रसाद भण्डारीले नगरपालिकाको निति तथा कार्यक्रम प्रस्तुत गर्नुभएको हो ।

यस्तै नगरसभामा स्वर्गद्धारी नगरपालिकाका नगर उपप्रमुख मिनराज राना मगरले आर्थिक बर्ष २०८१÷८२ को लागि ८३ करोड ७ लाख ३३ हजार रुपैयाँको बजेट प्रस्तुत गर्नुभएको छ । जसमा पुँजिगत खर्च तर्फ २५ करोड ७८ लाख रुपैयाँ (३१.०३ प्रतिशत) र चालु खर्च तर्फ ५७ करोड २९ लाख ३३ हजार रुपैयाँ (६८.९७ प्रतिशत) बजेट विनियोजन गरिएको छ । नगर उपप्रमुख मिनराज राना मगरले प्रस्तुत गर्नुभएको बजेटमा आर्थिक विकास तर्फ २ करोड १३ लाख रुपैयाँ , सामाजिक विकास तर्फ ४ करोड ४८ लाख रुपैयाँ , विपद् जोखिम न्युनिकरणका लागि ५० लाख रुपैयाँ बजेट विनियोजन गरिएको छ ।
नगर प्रमुख टेक प्रसाद भण्डारीले प्रस्तुत गर्नुभएको निति तथा कार्यक्रममा कृषि विविधिकरण एवं व्यवसायिकरणमा जोड दिईने बताईएको छ । नगरपालिकाले जग्गा प्लटिङ कार्यलाई निरुत्साहित गर्दै खेतियोग्य जग्गा बाँझो राख्ने कार्यलाई रोक्न आवश्यक कानुन निर्माण गर्ने , लोकल मदिरालाई ब्रान्डिङ गर्ने , सुचिकृत बेरोजगार व्यक्तिहरुलाई रोजगारी प्रदान गर्ने , नगरक्षेत्रलाई पर्यटकिय गन्तव्यको रुपमा विकास गर्ने , विद्यालयहरुलाई प्रविधिमैत्री बनाउन डिजिटल विद्यालयको अवधारणा अगाडि बढाउने गरि निती तथा कार्यक्रम ल्याएको छ ।
यस्तै नीति तथा कार्यक्रममा खेलकुद विकासलाई जोड दिने , यपमेयर एम्बुलेन्स सेवा मार्फत संस्थागत सुतकेरी वडा क्रमशः घोषणा गर्ने , १५ सैयाको अस्पताल निर्माण गर्ने , बालमैत्री नगर घोषणा गर्ने , नगरको छुट्टै भु—उपयोग निति लागु गर्ने , एक वडा एक ल्यान्डफिल्ड साईड निर्माण गर्ने , दलित, एकल महिला तथा फरक क्षमता भएका व्यक्तिहरुलाई व्यवसाय कर र व्यवसाय नविकरणमा ५० प्रतिशत छुट दिने , नगरपालिकाको डिजिटल प्रोफाईल तयार गर्ने उल्लेख गरिएको छ ।