प्युठान, २९ असार(जनखोजी)ः नेपाल कम्युनिस्ट पार्टी(माओवादी केन्द्र)का केन्द्रिय सदस्य पित बहादुर महतराले विद्यार्थी अग्रगमनका यात्री भएको बताउनुभएको छ ।
नेपाल कम्युनिस्ट पार्टी(माओवादी केन्द्र) निकट अखिल नेपाल राष्ट्रिय स्वतन्त्र विद्यार्थी यूनियन (क्रान्तिकारी)ले १२ औं पूर्ण बैठकलाई शनिवार सम्बोधन गर्दै महतराले सो कुरा बताउनु भएको हो । प्रमुख अतिथि महतराले देशमा माओवादीको अगुवाईमा आएका उपलब्धिहरुलाई उल्याउने प्रतिक्रियावादीहरु बेलाबेलामा जाग्न खोज्ने गरेका कारण विद्यार्थी तथा युवाहरु अग्रगमनका मोर्चामा अव्बलताका लागि सधै आफुलाई अब्बल गराउनु पर्नेमा जोड दिनु भयो । उहाँले विद्यार्थीले अध्ययन बढाएर विचार र वर्गीय दृष्टीकोणमा स्पष्ट भइ समाजमा सकारात्मक दृष्टीकोण निर्माणमा भूमिका निर्वाह गर्नु पर्ने उहाँको भनाइ थियो ।
महतराले वर्तमान सरकार ढल्नु माओवादीको दोस नभइ सुशासनका लागि माओवादी नेतृत्वको सरकारले लिएका सकारात्मक कदमहरु रहेको बताउनु भयो । उहाँले भन्नुभयो,‘राष्ट्रका पक्षमा प्रचण्ड नेतृत्वको सरकारले काम गर्न थालेपछि एमाले र कांग्रेसहरु मिलेर असफल बनाउन खोजेका छन्, तर यो धेरै टिक्दैन् ।’
अखिल (क्रान्तिकारी) प्युठान जिल्ला अध्यक्ष प्रेम बहादुर विश्वकर्माको अध्यक्षतामा बसेको बैठकमा पालिका सम्मेलन, जिल्ला सम्मेलन, प्रदेश सम्मेलन र २३ औं राष्ट्रिय सम्मेलनको तयारी लगायतका विषयमा छलफल भएको थियो । बैठकले आउँदो भदौ १ गते हुने प्युठान जिल्लाको अधिवेशनको तयारीका लागि विभिन्न उपसमितिहरु गठन गरेको छ ।
कार्यक्रममा नेकपा (माओवादी केन्द्र) लुम्बिनी प्रदेश सचिव कृष्ण अधिकारी(प्रकाश), नेकपा (माओवादी केन्द्र)प्युठान जिल्ला संयोजक यज्ञ बहादुर के.सी(प्रभात), अनेरास्ववियु क्रान्तिकारीका केन्द्रिय उपमहासचिव तुल्सीमणी के.सी, अनेरास्ववियु क्रान्तिकारीका केन्द्रिय सदस्य सुदर्शन पुन, अखिल नेपाल शिक्षक संघ लुम्बिनी प्रदेशका उपाध्यक्ष बिष्णु पोख्रेल लगायतले मन्तव्य राख्नुभएको थियो ।
अनेरास्ववियु क्रान्तिकारी प्यूठानका अध्यक्ष प्रेमबहादुर विश्वकर्माको अध्यक्षतामा सञ्चालन भएको बैठकमा स्वागत मन्तव्य शुशिला घर्तीले राख्नुभएको थियो । अनेरास्ववियु (क्रान्तिकारी) प्युठानका सचिवले सञ्चालन गरेको कार्यक्रममा जिल्ला इन्चार्ज पुष्कर शर्माले कमिटीले गरेका कामको बारेमा रिपोर्ट तथा कार्ययोजना प्रस्तुत गर्नुभएको थियो ।