प्युठान,देशभर रासायनिक मलको अभावका जानकारीहरु आइरहेको समयमा प्युठानमा भने अवैध युरिया लिएको भेटिएको छ । मंगलवार राती ९ बजेको समयमा जिल्ला प्युठान प्युठान नगरपालिका वडा नं –८ बाग्दुला बजारमा खटिएको बजार गस्तीले सवारी साधनहरु चेकजाँच गर्ने क्रममा अवैध युरिया फेला पारेको हो ।
पहेलो वोरामा रहेको ३५ (पैतिस) बोरा युरिया मल फेला परेको जिल्ला कपिलवस्तु शिवराज नगरपालिका वडा नं. ३ खरेन्द्रपुर वस्ने वर्ष २३ को विवश क्षेत्री (गाडी चालक) र सोही स्थानका वर्ष ३० को केशर महतरालाई पक्राउ गरिएको जिल्ला प्रहरी कार्यालय प्युठानका प्रमुख प्रहरी नायव उपरिक्षक सत्य बहादुर थापाले जानकारी दिए । उनीहरु लु १ च ६१७१ नं. को डबल पिकअप जिपको पछाडी ढालामा राखेर मल लैजान थालेका हुन् । कृषीमा प्रयोग हुने मल कपिलवस्तु जिल्लाको चन्द्रौटामा लिई बिक्री वितरण गर्ने प्रयोजनको लागी लिई जान लागेको भन्ने प्रारम्भिक अनुसन्धानबाट खुल्न आएको थापाको भनाइ छ । उनीहरुलाई पक्राउ गरी कालो वजार तथा केही अन्य समाजिक अपराध तथा सजाय ऐन २०३२ अन्तर्गत जिल्ला प्रशासन कार्यालय प्युठानबाट ७ दिनको म्यादथप भई थप अनुसन्धान भईरहेको जिल्ला प्रहरी कार्यालयले जनाएको छ ।