जनखोजी संवाददाता
प्युठान, जिल्लाका सफल व्यवसायी तथा उद्यमी पुर्ण प्रसाद कालाथोकीले विद्यार्थीसंग जन्मदिन मनाएका छन् । माण्डवी गाउँपालिका–४ धनचौरको जनज्योती प्रा.वि.मा कालाथोकीले विद्यार्थीहरुलाई कापीकलम वितरण गरेर जन्म दिन मनाएका हुन् ।
जनज्योती प्रा.वि.मा हाल ६२ विद्यार्थी रहेका छन् । माण्डवी गाउँपालिकाको गाउँमा रहेको विद्यालयमा कालाथोकीले ४१ दर्जन कापी र ९० गोटा कलम वितरण गरेका हुन् । उनी ४१ वर्ष पूरा गरी ४२ वर्षमा लागेका कारण ४१ दर्जन कापी वितरण गरेको बताए । कालाथोकीले गत वर्षको जन्मदिनमा अपाङ्ग संघ प्युठानमा रहेका बालबालिकासंग मनाएका थिए ।

उनले व्यवसायबाट आएको आम्दानीले जन्मदिनमा फजुल खर्च भन्दा पनि विपन्न, असहाय, गरिव बालबालिकाहरुसंग मनाउन रहर लाग्ने बताए । कापिकलम हस्तान्तरण गर्दै समाजमा भएका प्राकृतिक रुपमा शारिरिक कमजोरीहरुलाई विभेद नगरी विभेदरहित समाज निर्माणमा सबैले सहकार्य गर्नु पर्ने बताए । कालाथोकी जिल्ला अपाङ्ग संघको सदस्य, मल्टी पर्पोज कम्पनी, व्यवसायिक कृषि फर्मका संचालक हुन् । साथै समाजसेवा संगै नेपाली काँग्रेस प्युठानका महाधिवेशन प्रतिनिधि समेत हुन् ।
माण्डवी गाउँपालिका–३ का वडा सदस्य भोज बहादुर पुन, नेपाली काँग्रेसका पालिका उपसभापति ऋषिराम अधिकारी र सचिव बालिका नेपाली लगायतको उपस्थितिमा सामग्री विद्यालय प्रधानाध्यापक शान्ता सापकोटालाई हस्तान्तरण गरिएको हो । सापकोटाका अनुसार स्टेशनरी विद्यार्थीका अभिभावकहरुलाई बोलाई हस्तान्तरण गरिनेछ ।