जनखोजी समाचारदाता
योग प्राणायाम ध्यान जीवनशैली विषयक योग विज्ञान शिविर प्यूठान नगरपालिका ८ बाग्दुलामा सुरु भएको छ। प्यूठान नगरपालिकाको आयोजना र योग ध्यान आरोग्य सञ्जाल नेपाल लुम्बिनी प्रदेशको समन्वयमा शिविर सञ्चालन भएको हो।
विद्यालयमार्फत समाजमा सकारात्मक सन्देश प्रवाह गर्ने उदेश्यले शिविर आयोजना गरिएको प्यूठान नपालिकाका नगरप्रमुख विष्णु बहादुर योगीले बताउनु भयो। जीवनशैली परिवर्तनका लागि शिविर महत्वपूर्ण हुने उहाँले विश्वास ब्यक्त गर्नुभयो।
आईतबार सम्म चल्ने शिविरमा प्रतिष्ठित योग प्रशिक्षकहरु डा. चिन्तामणी योगी, डा. प्रकाश पाण्डे लगायतले सहजिकरण गर्नुहुनेछ। योग आशन अभ्यास, प्राणायाम प्रशिक्षण, ध्यान साधना, तनाव ब्यवस्थापन, स्वास्थ्य आहार र दिनचर्या, सकारात्मक सोच र जीवनशैली, रोग निवारण र प्रतिरोधात्मक क्षमता बृद्घि लगायतका विषयहरु शिविरमा समावेस हुनेछन्।
मेयर योगिको अध्यक्षतामा भएको कार्यक्रममा प्रशिक्षक र सहभागिलाई नगरप्रबक्ता सुमनराज श्रेष्ठले स्वागत गर्नुभएको थियो। कार्यक्रमको सञ्चालन शिक्षा शाखा प्रमुख बासुदेव पण्डितले गर्नुभएको थियो।
सिविर आयोजनाले नगरवासिलाई सकारात्मक नतिजा दिने भन्दै योग प्रशिक्षक ओमहरी भटराईले कृतज्ञता ब्यक्त गर्नुभयो। सरकारी तवरबाट योगको प्रवर्द्घन गरिंदा यसप्रति जनविश्वास बढ्ने पतञ्जली योग समिति प्यूठानका महासचिव ओमभक्त पण्डितको भनाई छ।
शिविरमा प्यूठान नगरपालिका भित्रका सामुदायिक विद्यालयका प्रधानाध्यापक र प्रतिनिधिको सहभागिता रहेको छ। योग शिविरको कार्यक्रम सबै तहका सरकारबाट सञ्चालन गर्न आवश्यक रहेको तालिमका सहभागी शिशुकल्याण प्रा.वि. टाकुराचौरका प्रधानाध्यापक जानका केसी ले बताउनु भयो।
