जनखोजी समाचारदाता
जेठ १,बिजुवार, प्युठान ।प्युठान नगरपालिकाले टिकुरी बसपार्क क्षेत्रको व्यवस्थापनलाई थप व्यवस्थित, सुरक्षित र प्रभावकारी बनाउन कडा कदम चालेको छ । नगरपालिकाको नगर कार्यपालिका कार्यालयले एक सार्वजनिक सूचना जारी गर्दै सम्पूर्ण सार्वजनिक यातायातका साधनहरू टिकुरी बसपार्कबाट मात्रै सञ्चालन गर्न निर्देशन दिएको छ ।
बाग्दुला बजार क्षेत्रको ट्राफिक व्यवस्थापन सम्बन्धी बैठकको निर्णयअनुसार यो नियम लागू गरिएको हो । नगरपालिकाले यातायात व्यवसायी, चालक तथा सहचालकहरूलाई अनिवार्य रूपमा बसपार्ककै प्रयोग गर्न आग्रह गरेको छ । तोकिएको स्थानबाट सवारी सञ्चालन नगरेमा प्रचलित कानून बमोजिम कारबाही गरिने चेतावनी समेत दिइएको छ।
यसका साथै, सार्वजनिक आवागमन र ट्राफिक प्रवाहमा अवरोध सिर्जना गर्ने संरचनाहरू हटाउन नगरपालिकाले ७ दिनको समयसीमा (अल्टिमेटम) दिएको छ ।
सडक पेटी, नाला तथा सार्वजनिक बाटो अतिक्रमण गरी बनाइएका टहरा, छाप्रा, व्यापारिक सामग्री र सडकमा थुपारिएका निर्माण सामग्रीहरू सो अवधिभित्र सम्बन्धित पक्ष आफैँले हटाउनुपर्नेछ।
नगरपालिकाका प्रमुख प्रशासकीय अधिकृत कमल प्रसाद भुसालद्वारा जारी सूचनामा भनिएको छ, “तोकिएको अवधिभित्र अतिक्रमित संरचना तथा सामग्री नहटाएमा र सार्वजनिक सवारी साधन टिकुरी बसपार्कबाट सञ्चालन नगरेमा प्रचलित कानून बमोजिम कडा कारबाही प्रक्रिया अघि बढाइनेछ।”
नगरपालिकाको यस निर्णयले नगरक्षेत्रका यातायात तथा बजार व्यवस्थापनमा महत्त्वपूर्ण सुधार आउने अपेक्षा गरिएको छ।
